Shkup, 24 nëntor – Për vitin 2025 janë planifikuar gjithsej 53 miliardë denarë, ose 862 milionë euro, për pagesën e transfereve. Këto transfere nga Qeveria drejt Fondeve të Sigurimit Pensional nuk janë vetëm për pagesën e pensioneve, por edhe për sigurimin shëndetësor të pensionistëve dhe shpenzimet tranzicionale ndaj shtyllës së dytë pensionale. Kështu që, deficiti buxhetor në fondet pensionale lidhet me këto tre komponentë, tha drejtori i Fondit të Sigurimit Pensional dhe Invalidor, Nikola Memov, në emisionin “Triling”.
I pyetur nëse vitin e ardhshëm do të ketë rritje të pensioneve, Memov tha se rritja është e garantuar sipas ligjit të miratuar këtë vit.
