Kryeministri i Maqedonisë zhvilloi sot në Bruksel një takim miqësor dhe konstruktiv me presidentin e Këshillit Evropian, z. Antonio Koshta. Ky është takimi i dytë mes dy liderëve, pas atij të parë zhvilluar një vit më parë, menjëherë pas zgjedhjes së z. Koshta në krye të Këshillit Evropian.
Në deklaratën për media pas takimit, kryeministri theksoi se marrëdhëniet mes Maqedonisë dhe z. Koshta janë zhvilluar në frymë miqësie dhe mirëkuptimi, duke vlerësuar presidentin e Këshillit Evropian si “mik të madh të Maqedonisë”.
Temë qendrore e bisedimeve ishte procesi i afrimit të Maqedonisë me Bashkimin Evropian dhe fillimi formal i negociatave të anëtarësimit. Kryeministri përsëriti qëndrimin e qeverisë për të mbrojtur dinjitetin e vendit pas vështirësive të përjetuara gjatë 25 viteve të fundit në rrugëtimin evropian.
Gjatë takimit u diskutuan edhe disa projekte të rëndësishme strategjike, përfshirë interkonektorin e gazit me Serbinë dhe degën e gazsjellësit që do të lidhë Maqedoninë me Kosovën. Po ashtu, u fol për tarifat e çelikut dhe produkteve të çelikut të prodhuesve maqedonas, si dhe për një projekt të përbashkët me Komisionin Evropian që do të realizohet në Koçan dhe rajonin përreth.
Kryeministri e vlerësoi takimin si “jashtëzakonisht produktiv”, duke theksuar se prioritetet e Maqedonisë përkojnë plotësisht me ato të presidentit Koshta.
Agjenda e kryeministrit në Bruksel do të vazhdojë me një intervistë për Euronews dhe një darkë pune me komisioneren evropiane, znj. Marta Kos. Ai shprehu optimizëm për “lajme pozitive” në vijim.
