Zjarrvëniet e qëllimshme do të ndiqen penalisht si vepra terroriste

“E në korniza të procedurave parlamentare kam biseduar me koordinatorin e grupit parlamentar të VMRO-DPMNE-së urgjentisht të kemi ndryshime në ligje me çka zjarrvënia do të kualifikohet si vepër “terrorizëm” ndërsa hedhja e mbeturinave atje ku nuk e ka vendin, do të llogaritet si vepër tjetër penale e cila do të jetë e dënueshme me mbi pesë vite burg”, u shpreh Hristijan Mickoski – Kryeministër.

Ky propozim vjen pasi javën e fundit shpërthyen zjarre në deponi të ndryshme në kryeqytet, e për të cilat, Mickoski dyshon se janë të qëllimshme dhe të organizuara nga qendra të fuqishme. Një nga atë raste të zjarr vënieve të qëllimshme, është edhe rasti i mëngjesit të sotëm në Kisella Vodë, thotë Mickoski.

“Për fat të keq ekzistojnë qendra të fuqishme të cilat përpiqen të imponojnë frikë dhe panikë te qytetarët para zgjedhjeve dhe përgjigja e pyetjes se kujt i konvenon kjo, mendoj se me një analizë të shkurtër do ta fitoni vet nëse e bëni”, tha Hristijan Mickoski – Kryeministër.

Por edhe pas gjitha këtyre paralajmërimeve se ekzistojnë qendra të fuqishme, se po bëhen sulme hibride mbi qeverinë, pas situatës së rënduar me zjarret, presidentja Siljanovska Davkova për momentin nuk planifikon të thërrasë mbledhje të këshillit të sigurisë.

“Presidentja gjithnjë i konsulton anëtarët e Këshillit para se të thërrasë seancë, si dhe organet dhe shërbimet kompetente. Për momentin po zhvillohen aktivitete të orientuara drejt zbulimit të arsyeve për zjarret, sanimin e pasojave dhe parandalimin e incidenteve të ngjashme. Kuptohet, mund të presim dhe identifikimin e kryerësve eventual, vërtetimin e përgjegjësisë dhe sanksionimin e tyre. Për thirrjen dhe mbajtjen e mbledhjes, nevojiten informacione relevante dhe materiale të përgatitura”, thonw nga Presidenca.

Një ditë më parë ministri i brendshëm Pançe Toshkovski tha se për momentin nuk ka asnjë dëshmi se bëhet fjalë për organizim të përbashkët për zjarret e shkaktuara. Po të kishte një gjë të tillë, do të kishte edhe veprime të tjera nga ana e ministrisë tha Toshkovski. Brenda një jave, shpërthyen zjarre në deponitë në Shuto Orizare, në Drislla, në Vardarishte, në Trubarevë si dhe në një servis veturash në Kisella Vodë.