“Tentativat e dëshpëruara të AKI së shpartalluar dhe pa busull për t’i përkthyer zgjedhjet e 19 tetorit në “mandate deputetësh” janë dëshmi se ky koalicion nuk ka humbur vetëm vota, por edhe kontaktin me realitetin”, thuhet në njoftimin e VLEN-it, duke përkujtuar oponentët e tyre politik se këto ishin zgjedhje lokale dhe janë të pabaza kalkulimi i rezultatit me mandate deputetësh.
Këto ishin zgjedhje lokale. Dhe pikërisht këtu, shqiptarët folën më qartë se kurrë, zgjodhën ndryshimin, zgjodhën VLEN-in. Në më shumë se dhjetë komuna, shqiptarët dhanë besimin për energji të re, për fytyra që punojnë, jo që fshihen pas patriotizmit të rremë kur s’kanë çfarë t’u ofrojnë njerëzve. Ata zgjodhën politikën e rezultateve, jo politikën e frikës”, thonë nga VLEN.
Sipas VLEN-it deklaratat e zyrtarëve të AKI-së paraqesin dëshmi për panikun që e ka përfshi këtë koalicion.
“As interpretimet televizive të figurave të përmbysura nuk mund ta ndryshojnë faktin që tashmë është i pamohueshëm se VLEN mbulon gjithë hartën politike shqiptare. Dhe kjo është e vetmja hartë që vlen, ajo e vullnetit të lirë të qytetarëve. Deklaratat e Arbër Ademit, Blerant Ramadanit, Krenar Llogës dhe disa të tjerëve, që dalin me grafikone imagjinare për “deputetë të ardhshëm” që s’do t’i shohim kurrë, janë dëshmi e panikut që ka përfshirë koalicionin me shirit ngjitës. Ata ende nuk e kanë kuptuar mesazhin e popullit se është koha të reformoheni, jo të trilloni përralla për t’i mbajtur militantët zgjuar. Katër ditë me radhë, lideri i tyre “i pakontestueshëm”, Ali Ahmeti, nuk është shfaqur askund. Ndoshta ende po pret t’ia tregojnë rezultatet e “referendumit”. Arbër Ademit, Blerant Ramadanit dhe Krenar Llogës u urojmë dalje sa më të shpeshta publike. Çdo herë që flasin, AKI humb nga një mijë vota. Dhe ne, sinqerisht, s’kemi asgjë kundër”, thuhet në njoftimin e VLEN-it.
