Presidenti amerikan Donald Trump ka deklaruar se çdo vend që zhvillon marrëdhënie tregtare me Iranin do të përballet me tarifa prej 25% në çdo shkëmbim tregtar me Shtetet e Bashkuara, ndërsa Uashingtoni po shqyrton një përgjigje ndaj situatës së tensionuar në Iran, ku po zhvillohen protestat më të mëdha antiqeveritare të viteve të fundit.
“Duke hyrë në fuqi menjëherë, çdo vend që bën biznes me Republikën Islamike të Iranit do të paguajë një tarifë prej 25% për çdo biznes që bëhet me Shtetet e Bashkuara të Amerikës. Ky urdhër është përfundimtar dhe i pakthyeshëm”, deklaroi Trump.
Vendimi ka nxitur reagime ndërkombëtare. Ambasada kineze në Uashington kritikoi ashpër qasjen e Trump, duke theksuar se Kina do të marrë “të gjitha masat e nevojshme” për të mbrojtur interesat e saj dhe duke kundërshtuar, siç u shpreh, “sanksionet e paligjshme unilaterale dhe juridiksionin e zgjeruar”.
“Qëndrimi i Kinës kundër vendosjes pa dallim të tarifave është i qartë dhe konsistent. Luftërat tarifore dhe tregtare nuk kanë fitues, ndërsa shtrëngimi dhe presioni nuk mund të zgjidhin problemet”, tha një zëdhënës i ambasadës kineze në një postim në platformën X.
Edhe Japonia dhe Koreja e Jugut, të cilat vitin e kaluar arritën marrëveshje tregtare me SHBA-në, reaguan duke thënë se po e monitorojnë nga afër situatën. Ministria e Tregtisë e Koresë së Jugut deklaroi se Seuli do të ndërmarrë “çdo masë të nevojshme” sapo të bëhen të qarta veprimet konkrete të qeverisë amerikane.
Ndërkohë, zëvendëssekretari i Kabinetit të Japonisë, Masanao Ozaki, tha se Tokio do të shqyrtojë me kujdes përmbajtjen e çdo mase të re dhe ndikimin e saj të mundshëm në ekonominë japoneze, duke reaguar në mënyrë të përshtatshme.
Nga ana tjetër, Teherani ka bërë të ditur se po i mban të hapura kanalet e komunikimit me Uashingtonin, ndërsa administrata Trump po vlerëson hapat e radhës përballë situatës në Iran.
Protestat në Iran kanë nisur si reagim ndaj vështirësive të rënda ekonomike, por më pas janë shndërruar në thirrje të hapura për rrëzimin e establishmentit klerikal. Sipas grupit për të drejtat e njeriut HRANA, me seli në SHBA, që nga fillimi i protestave më 28 dhjetor janë verifikuar 599 viktima, përfshirë 510 protestues dhe 89 pjesëtarë të forcave të sigurisë.
