Disa linje private të transportit publik të Shkupit vazhdojnë të mos kryejnë shërbime për qytetarët për shkak të mospagesës nga ana e NQP-së. Sipas informatave tona, që nga muaji qershor nuk është shlyer borxhi ndaj tyre ndërsa presin që pasi të bëhet pagesa të rikthehen në rrugë. Qytetarët edhe sot u përballën me mungesë të autobusëve nëpër stacione.
Sipas transportuesve privatë, shtesa e pagesës për 20 denarë për kilometër është e pranueshme edhe pse kërkesa e tyre ka qenë 30 denarë shtesë apo 100 denarë për kilometër.
Në seancën e një dite më parë të Këshillit të Qytetit të Shkupit u miratua vendimi për rritjen e çmimit për kilometër për transportuesit privatë. Këshilltarët pranuan propozimet për korrigjimin e çmimit, i cili nuk ishte rishikuar që nga viti 2015.
“Propozimin për ndryshimin e vendimit për përcaktimin e vlerës së kompensimit për shërbimet e kryera në transportin e udhëtarëve sipas kriterit për kilometrat e kaluara, e hodha në votim. 28 kanë votuar pro. Kundër nuk ka. Të përmbajtur një. Konstatoj që vendimi është marrë”, deklaroi Trajko Sllaveski – Kryetari i Këshillit të Qytetit të Shkupit.
Kjo rritje është rezultat i protestave intensive të transportuesve privatë, të cilët së fundmi ndërprenë qarkullimin dhe kërkuan korrigjim të pagesës për kilometër. /Alsat.mk
