Edicioni i sivjetshëm i Festivalit të Xhazit në Tetovë do të mbahet nga 11 deri më 13 shtator. Ky festival tashmë është shndërruar në një ngjarje të rëndësishme kulturore për qytetin, duke sjellë artistë nga vende të ndryshme të botës dhe duke ofruar një hapësirë edukative muzikore për publikun.
Një nga rikthimet më të pritura këtë vit është ikona shqiptare e muzikës xhaz, Elina Duni. Përveç saj, gjatë viteve, festivali ka mirëpritur artistë nga Peruja, Brazili, Franca, Gjermania, Italia, Austria, Bullgaria, Algjeria, Maroku, Turqia, si dhe artistë shqiptarë nga Shqipëria, Kosova dhe diaspora.
Përzgjedhja e pjesëmarrësve bëhet duke u bazuar në kërkesën e publikut dhe duke sjellë projekte cilësore, që variojnë nga etno-xhazi, shumë i pëlqyer në rajon, deri tek stile më eksperimentale e jokonvencionale, duke i ofruar publikut diversitet artistik.
