I ati dhe të dyshuarit tjerë për rrëmbimin dhe vrasjen e Vanja Gjorçeskës (14) nuk janë pritur mirë nga të burgosurit tjerë në burgun e Shkupit.
Drejtori i burgut, Filip Andov nuk konfirmoi e as demantoi informacionet se nuk janë pritur mirë nga të burgosurit tjerë dhe thekson se siguria është nën kontroll dhe se qasje deri te katër të dyshuarit është e kufizuar.
“Ata janë të ndarë nga të paraburgosurit tjerë. Jo secili zyrtar në burg ka qasje në ato hapësira. Aty mund të hysh me kartelë të posaçme që i mbajnë disa rojtarë të caktuar. Ata kontrollohen vazhdimisht sipas protokolleve dhe ligjeve”, tha Andov.
Tre nga katër të paraburgosurit e kanë pranuar fajin për krimet për të cilat akuzohet përveç të atit, ndërsa Ljupç Palevski pritet të ekstradohet nga Turqia.
