Boban Stefkovski, kandidati për kryetar të komunës së Gazi Babës nga radhët e VMRO-DPMNE-së, në mitingun e sotëm të mbajtur në kuadër të fushatës zgjedhore me moton “Zgjedhja e vërtetë! Njeriu yt! Vendi yt! Për të ardhmen tënde!”, mbajti fjalim ku theksoi një pjesë të projekteve të realizuara gjatë mandatit të tij katërvjeçar.
“Gjatë këtyre katër viteve kemi bërë shumë. Kemi realizuar 670 projekte të reja në gjithë territorin e komunës sonë Gazi Babë, kemi ndërtuar 32 kilometra rrjet të ri të kanalizimit fekal, po ndërtojmë tre çerdhe të reja në Trubarevë, Injikovë dhe Maxhari, kemi ndërtuar salla sportive shkollore në Bulachan dhe Stajkovc, ndërsa po ndërtojmë sallë të re edhe në Qreshevë. Po ndërtojmë gjithashtu një ndërtesë të re shkollore për shkollën fillore ‘Krste Misirkov’ në Çento dhe po e rikonstruktojmë plotësisht Shtëpinë ‘11 Tetori’, e cila për shumë vite ishte vetëm premtim dhe e harruar. Po investojmë edhe në sport, në mbrojtjen e mjedisit jetësor dhe në përkujdesjen sociale”, tha Stefkovski.
Ai renditi edhe disa nga projektet që përfshihen në programin zgjedhor:
“Në program janë përfshirë projekte reale që do ta vazhdojnë zhvillimin në të gjitha vendbanimet e komunës së Gazi Babës. Në katër vitet e ardhshme:
– Do të ndërtojmë çerdhe të reja në Keramidnicë, Hipodrom 2 dhe Singeliq;
– Do të realizojmë projektin për zero taksa komunale për ndërtimin e shtëpive për çiftet e reja deri në moshën 29 vjeç;
– Do të ndërtojmë salla sportive shkollore në Zhelezarë, Singeliq, Strachinc dhe Çento;
– Do të subvencionojmë qytetarët për ndërtimin e fasadave efikase energjikisht në ndërtesa;
– Do të ndërtojmë garazhe me kate në Avtokomandë dhe Çento;
– Do të hapim qendër ditore për fëmijë dhe persona me aftësi të kufizuara;
– Do të ndërtojmë një pishinë të mbyllur në Avtokomandë;
– Do të rikonstruktojmë rrugët lokale më të mëdha në komunë, si Laza Pop Trajkov në Avtokomandë, Henri Barbis dhe Karl Hron në Triangla, Sreçko Puxhalka, Finska dhe Trajko Kitanchev në Çento, Pehçevska në Hipodrom dhe shumë të tjera;
– Do të ndërtojmë nyjen lidhëse tek Hipodromi dhe do të bëjmë rikonstruksion të plotë të rrugës rajonale 1102, në bashkëpunim me Ndërmarrjen Publike për Rrugë Shtetërore;
– Do të ndërtojmë 40 kënde të reja lojërash për fëmijë në gjithë Gazi Babën dhe dy parqe adrenalinash.
Në mandatin tim të dytë, Rashteku, Bulachani, Viniçe, Brnjarci dhe Ergele do të marrin rrjetin e kanalizimit fekal, ndërsa do të përfundojmë plotësisht ndërtimin e kanalizimit fekal në Jurumleri, Idrizovë, Drmë, Çukur Maalo dhe Goce Dellçev”, theksoi Stefkovski.
Në fund, Stefkovski u bëri thirrje qytetarëve që të bëjnë zgjedhjen e duhur dhe të rrethojnë numrin 9 për punë, siguri dhe zhvillim të komunës.
“Dilni dhe bëjeni ndryshimin e vërtetë. Jo vetëm për mua, por për veten tuaj, për fëmijët tuaj, për të ardhmen e Gazi Babës. Rrethoni numrin 9, sepse ai simbolizon punë, siguri dhe zhvillim. Besimin që do të më jepni, do ta justifikoj me më shumë përkushtim, më shumë përgjegjësi dhe më shumë dashuri ndaj këtij populli”, u shpreh Stefkovski.
