Qeveria, në mbledhjen e sotme, duke shqyrtuar gjendjen aktuale ekonomike dhe ndikimin e luhatjeve globale të çmimeve mbi tregun e brendshëm, mori vendim për vazhdimin e masës për uljen e akcizave të derivateve të naftës, me vlefshmëri deri më 04 maj.
Me këtë vendim vazhdohet ulja e akcizës për dizelin prej 4 denarësh për litër, si dhe ulja e akcizës për benzinat pa plumb 95 dhe 98 oktan në prej 2 denarësh për litër. Kjo ndërhyrje ka efekt të drejtpërdrejtë fiskal dhe tregtar, i cili reflektohet në ulje të konsiderueshme të çmimeve me pakicë të karburanteve, duke zbutur presionin mbi shpenzimet e jetesës dhe duke amortizuar impulset inflacioniste.
Me vazhdimin e kësaj mase, Qeveria demonstron qartë një qasje proaktive dhe të përgjegjshme në menaxhimin e krizës, ku prioritet mbetet mbrojtja e standardit jetësor të qytetarëve dhe ruajtja e stabilitetit ekonomik.
Gjithashtu, duke pasur parasysh efektet stabilizuese të masave të deritanishme dhe lëvizjet aktuale të çmimeve, Qeveria mori vendim për ndryshimin e Vendimit për zbatimin e normës preferenciale të tatimit mbi vlerën e shtuar. Sipas këtij ndryshimi, norma preferenciale prej 10% do të vazhdojë të zbatohet për benzinat, ndërsa për produktet e tjera kthehet norma e rregullt prej 18%.
Kjo masë paraqet një qasje të balancuar me kujdes ndërmjet nevojës për mbështetje të targetuar për qytetarët dhe sigurimit të qëndrueshmërisë fiskale, ku Qeveria mbetet plotësisht e përkushtuar për monitorim të vazhdueshëm të gjendjes dhe ndërmarrje në kohë të politikave të adekuate ekonomike.
Sipas llogaritjeve tona, presim që Komisioni Rregullator për Energjetikë të marrë vendim me të cilin do të realizohet një ulje shtesë e çmimeve me pakicë të derivateve të naftës mesatarisht për rreth 1,5 denarë për litër. Njëkohësisht, mbetet në fuqi edhe mekanizmi i dakorduar paraprakisht me kompanitë e naftës, sipas të cilit sigurohet ulje shtesë prej 3 denarësh për litër për naftën dhe 2 denarësh për litër për benzinat. Me këtë arrihet një efekt kumulativ i uljes së çmimeve, i cili reflektohet drejtpërdrejt në uljen e shpenzimeve të transportit dhe në zbutjen e presioneve inflacioniste mbi ekonominë.
