Vendet e Ballkanit shënojnë pozicione të ndryshme në listën e pasaportave më të fuqishme për vitin 2026, ku Maqedonia e Veriut(RMV) regjistron përmirësim, Shqipëria dhe Kosova rënie, ndërsa Greqia mbetet më e forta në rajon. Sipas renditjes më të fundit të Henley Passport Index, pasaporta e RMV-së renditet në vendin e 38-të, duke u mundësuar qytetarëve udhëtim pa vizë në 128 shtete.
Tre pasaportat kryesore, sipas raportit të fundit nga Henley Passport Index, janë vendet aziatike: Singapori në vendin e parë me 192 destinacione pa pasur nevojë për një vizë, ose që e merr atë në mbërritje, Japonia dhe Koreja e Jugut të barabarta në vendin e dytë, përcjell INA.
Dy vende nga Ballkani është në listën e 10 pasaportave më të forta në botë për vitin 2026.
Bëhet fjalë për Greqinë, që renditet në vend të katërt bashkë me Italinë, Francën, Gjermaninë etj… me 185 destinacione pa viza, si dhe Kroacinë në vend të 6.
Sa i përket Shqipërisë dhe Kosovës, renditen të fundit në Ballkan, edhe pas Bosnje e Hercegovinës që kanë një pasaportë me 124 destinacione pa viza.
Kroacia është e renditur në vendin e gjashtë gjithashtu, duke ndarë pozitën me disa vende të BE-së dhe duke u lejuar qytetarëve të saj udhëtim pa vizë në 183 shtete.
Në nivel global, vendet aziatike vazhdojnë të dominojnë renditjen e pasaportave më të fuqishme. Singapori kryeson listën për vitin 2026, me akses pa vizë në 192 nga gjithsej 227 destinacione të monitoruara. Japonia dhe Koreja e Jugut ndajnë vendin e dytë, me nga 188 destinacione secila.
Pas tyre vijnë disa shtete evropiane si Danimarka, Luksemburgu, Spanja, Suedia dhe Zvicra, të cilat ndajnë vendin e tretë me akses në 186 destinacione. Një grup prej dhjetë shtetesh, përfshirë Gjermaninë, Francën, Italinë dhe Greqinë, renditen në vendin e katërt me 185 destinacione pa vizë.
Emiratet e Bashkuara Arabe kanë shënuar përparimin më të madh në historinë 20-vjeçare të indeksit, duke u ngjitur për 57 pozicione që nga viti 2006. Në të kundërt, Mbretëria e Bashkuar ka regjistruar rënien më të madhe vjetore, ndërsa Shtetet e Bashkuara renditen në vendin e dhjetë, me akses pa vizë në 179 shtete.(INA)
