Një pikturë e konsideruar e humbur e artistes skoceze Joan Eardley është shitur për 29,500 paund, pasi u zbulua rastësisht në një dyqan bamirësie në East Midlands të Anglisë.
Vepra, e titulluar Summer Fields, u gjet gjatë një kontrolli rutinë të sendeve të ardhura nga një shtëpi e zbrazur. Stafi i dyqanit vuri re një etiketë të zbehur në pjesën e pasme të pikturës, e cila e lidhte atë me “The Scottish Gallery” në Edinburg.
Pas verifikimeve, galeria konfirmoi se bëhej fjalë për një vepër autentike të Eardley, e realizuar rreth vitit 1961 dhe që paraqet një peizazh të fushave në Aberdeenshire.
Piktura u shit më pas për një koleksionist privat të artit skocez, ndërsa sipas drejtorit të galerisë, Tommy Zyw, kjo është shitja më e madhe në historinë e organizatës bamirëse përmes së cilës u zbulua vepra.
Eardley, e lindur në Angli në vitin 1921 dhe e rritur në Skoci, është e njohur për pikturat e saj të fëmijëve të rrugës në Glasgow dhe peizazhet bregdetare të Catterline. Ajo ndërroi jetë në vitin 1963, në moshën 42-vjeçare.
Sipas ekspertëve, zbulimi i kësaj vepre konsiderohet një nga rastet më të rralla të viteve të fundit në tregun e artit britanik, duke rritur edhe më tej interesin për krijimtarinë e artistes./KultPlus.com
