Presidentja e Republikës së Kosovës, Vjosa Osmani, ka përmbyllur vizitën e saj zyrtare në Washington, D.C., ku mori pjesë në takimin inaugurues të Bordit të Paqes, me ftesë të Presidentit të Shteteve të Bashkuara të Amerikës, Donald Trump.
Si shtet bashkëthemelues përkrah SHBA-ve, Kosova u prezantua në këtë forum si vend i përkushtuar ndaj paqes dhe sigurisë globale, duke forcuar pozicionin e saj në arenën ndërkombëtare.
Takime me zyrtarë të lartë amerikanë
Gjatë qëndrimit në kryeqytetin amerikan, Presidentja Osmani zhvilloi diskutime me Presidentin Trump dhe zyrtarë të kabinetit të tij. Ajo u prit gjithashtu në takim nga Sekretari amerikan i Shtetit, Marco Rubio, me të cilin bisedoi për hapa konkretë në forcimin e partneritetit strategjik Kosovë–SHBA, avancimin e integrimit të Kosovës në NATO dhe thellimin e bashkëpunimit në fushën e mbrojtjes dhe ekonomisë.
Presidentja u takua edhe me zyrtarë të tjerë të lartë amerikanë, përfshirë përfaqësues të Departamentit të Shtetit dhe Këshillit Kombëtar të Sigurisë.
Bashkëbisedime me liderë botërorë
Në kuadër të Bordit të Paqes, Osmani zhvilloi takime dhe bashkëbisedime me një sërë liderësh ndërkombëtarë, ndër ta:
Hamad bin Isa Al Khalifa, Emir i Bahreinit
Santiago Peña, President i Paraguajit
Ilham Aliyev, President i Azerbajxhanit
Prabowo Subianto, President i Indonezisë
Kassym-Jomart Tokayev, President i Kazakistanit
Shavkat Mirziyoyev, President i Uzbekistanit
Nicușor Dan, President i Rumanisë
Edi Rama, Kryeministër i Shqipërisë
Mohammed bin Abdulrahman Al Thani, Kryeministër i Katarit
Shehbaz Sharif, Kryeministër i Pakistanit
Viktor Orbán, Kryeministër i Hungarisë
Nikol Pashinyan, Kryeministër i Armenisë
Antonio Tajani, Zëvendëskryeministër dhe Ministër i Jashtëm i Italisë
Hakan Fidan, Ministër i Jashtëm i Turqisë
Tony Blair, ish-Kryeministër i Mbretërisë së Bashkuar
Gianni Infantino, President i FIFA-s
Vizita u konsiderua si një hap i rëndësishëm në thellimin e marrëdhënieve ndërkombëtare të Kosovës dhe në konsolidimin e partneritetit të saj strategjik me Shtetet e Bashkuara të Amerikës./KultPlus.com
