Mbi 70 ekspertë, përfaqësues të laboratorëve, institucioneve, trupave rregullatore dhe kompanive nga disa vende të rajonit po marrin pjesë në Simpoziumin e 10-të Rajonal të Laboratorëve për Naftë dhe Derivate të Naftës, që po mbahet në Ohër me mbështetjen e OKTA AD – Skopje. Edicioni jubilar i Simpoziumit konfirmon rolin e tij gjithnjë në rritje si një platformë e rëndësishme rajonale për shkëmbimin profesional të përvojave, njohurive, praktikave bashkëkohore dhe teknologjive të reja në fushën e kontrollit të cilësisë, analizave laboratorike, rregullativës dhe sigurisë në industrinë e naftës.
Në këtë ngjarje marrin pjesë përfaqësues nga Maqedonia e Veriut, Greqia, Bullgaria, Kroacia, Sllovenia, Serbia, Bosnja dhe Hercegovina dhe vende të tjera të rajonit, të cilët përmes prezantimeve profesionale dhe diskutimeve do të shkëmbejnë përvoja mbi standardet më të reja, teknologjitë dhe sfidat në sektor.
Në fjalën e tij përshëndetëse, drejtori ekzekutiv i OKTA-s, Dimitrios Paschos, theksoi se mbështetja e iniciativave të tilla profesionale dhe rajonale është plotësisht në përputhje me strategjinë afatgjatë të kompanisë.
“Për OKTA-n, mbështetja e platformave si ky Simpozium paraqet investim në dije, bashkëpunim dhe lidhje rajonale. Shkëmbimi i përvojave dhe praktikave të mira ndërmjet ekspertëve dhe institucioneve nga rajoni është me rëndësi të jashtëzakonshme për zhvillimin e mëtejmë të sektorit dhe për sigurimin e standardeve më të larta të cilësisë dhe sigurisë, në interes të konsumatorëve dhe ekonomisë. Si kompani, OKTA prej kohësh e ka tejkaluar rolin e furnizuesit më të madh në tregun vendor dhe po zhvillohet në një qendër rajonale energjetike, ndërsa pikërisht mbështetja jonë në zhvillimin e partneriteteve dhe rrjeteve profesionale është pjesë e rëndësishme e këtij vizioni”, deklaroi Paschos.
Nga Komiteti Organizativ i Simpoziumit u theksua se edicioni jubilar i dhjetë paraqet konfirmim të rëndësisë në rritje të këtij tubimi profesional në rajon.
“Në dhjetë vitet e fundit, Simpoziumi është shndërruar në një platformë të njohur rajonale për komunikim profesional dhe bashkëpunim ndërmjet laboratorëve, institucioneve dhe kompanive nga sektori i naftës. Në kohën e standardeve gjithnjë e më të rrepta, ndryshimeve teknologjike dhe nevojës për harmonizim më të madh me rregullativat evropiane, ngjarje të tilla kanë rëndësi të veçantë për avancimin e cilësisë, sigurisë dhe besimit në të gjithë zinxhirin e furnizimit me derivate”, theksoi Danijela Jović, përfaqësuese e komitetit organizativ të Simpoziumit.
Simpoziumin e hapi kryetari i Komunës së Ohrit, Kiril Pecakov, ndërsa përmes video-mesazhit përshëndeti edhe ministrja e Energjetikës, Minierave dhe Burimeve Minerale, Sonja Bozhinovska, e cila theksoi rëndësinë e laboratorëve dhe kontrollit të cilësisë në sektorin energjetik, si dhe nevojën për modernizim të vazhdueshëm, bashkëpunim rajonal dhe harmonizim me standardet evropiane.
Prania e përfaqësuesve të Ministrisë së Energjetikës, si dhe video-adresimi i ministres, paraqesin mbështetje të fuqishme institucionale për rolin e laboratorëve në sistemin e kontrollit të cilësisë së karburanteve, por edhe njohje për arritjet e Simpoziumit dhe potencialin e tij për t’u shndërruar në një platformë edhe më të gjerë rajonale dhe ndërkombëtare për shkëmbimin e përvojave dhe ekspertizës.
Në kuadër të Simpoziumit u theksua edhe rëndësia e modernizimit dhe digjitalizimit të kapaciteteve laboratorike, si parakusht për saktësi më të madhe, besueshmëri dhe harmonizim me standardet më të larta evropiane dhe ndërkombëtare. Në këtë kontekst u përmend shembulli i OKTA-s, e cila në periudhën e kaluar realizoi modernizimin dhe digjitalizimin e pajisjeve për testim në laboratorin e saj për kontrollin e cilësisë së karburanteve, duke ruajtur kështu statusin si një nga kapacitetet më moderne të këtij lloji në rajon.
Laboratori i OKTA-s është laboratori i parë i akredituar i këtij lloji në vend dhe funksionon sipas standardeve më të larta evropiane dhe amerikane, duke ofruar kontroll dhe analiza jo vetëm për nevojat e kompanisë, por edhe për importues të tjerë, institucione dhe kompani nga vendi dhe rajoni.
Pjesëmarrësit në Simpozium theksuan se e ardhmja e sektorit do të varet nga bashkëpunimi edhe më i madh rajonal, shkëmbimi i njohurive, aplikimi i teknologjive të reja dhe avancimi i vazhdueshëm i sistemeve për kontroll dhe monitorim të cilësisë së karburanteve, në interes të konsumatorëve, industrisë dhe mjedisit jetësor.
Ohër, 14 maj 2026.
Ohri nikoqir i Simpoziumit të 10-të Rajonal të Laboratorëve për Naftë dhe Derivate të Naftës – OKTA konfirmon rolin e saj si partner rajonal energjetik
