Gjigandi i avionëve ‘Boeing’ ka pësuar një tjetër pengesë, pasi njoftoi se prodhimi i aeroplanëve të tij të shumëpritur “777X” do të shtyhet për në vitin 2027, duke i kushtuar 5 miliardë dollarë (3.7 miliardë paund) në penalitete për vonesa në dorëzim.
Firma amerikane tha se modeli i saj ishte vonuar për shkak të pengesave rregullatore në rritje, të cilat duhet t’i kalojë.
Kjo vjen gjatë një rritjeje të kërkesës për udhëtime ndërkombëtare, kur Boeing dëshiron të nxisë modelin e saj më të fundit, si një përmirësim të modeleve të saj ikonike 747 dhe 777, një nga të preferuarit e linjave ajrore komerciale.
Boeing, i prekur nga problemet e besimit pas një serie fatkeqësish, përfshirë shpërthimin e derës së një avioni në mes të fluturimit, tha se të ardhurat në tre muajt deri në shtator u rritën me 30% në 23.27 miliardë dollarë krahasuar me të njëjtën periudhë të vitit të kaluar.
Drejtori ekzekutiv i saj, Kelly Ortberg, tha se firma po punonte për të “rivendosur besimin me të gjithë palët e interesuara” dhe se ishte i zhgënjyer me vonesën e orarit të 777X, megjithëse shtoi se avioni performoi “mirë në testimet e fluturimit”.
Ai tha se Boeing po punonte për të “stabilizuar operacionet tona për të rikuperuar plotësisht performancën e kompanisë sonë”.
Përveç ankesave për sigurinë e disa prej avionëve të saj në vitet e fundit, firma ka vuajtur nga greva të stafit për pagat dhe kushtet. Më shumë se 3,000 punëtorë në dy nga njësitë e saj të mbrojtjes në SHBA dolën në grevë në gusht, ndërsa vitin e kaluar, një grevë e rreth 30,000 punëtorëve të aeroplanëve të pasagjerëve përfundoi pas shtatë javësh.
Ortberg është zotuar më parë të “rikthejë besimin” në biznes, të rishikojë kulturën e tij korporative dhe t’i japë përparësi sigurisë së pasagjerëve. Në rezultatet e saj të fundit, Boeing tha se kishte dorëzuar 55 aeroplanë në shtator, një rritje nga viti i kaluar kur grevat reduktuan dorëzimet dhe i kushtuan firmës miliarda.
