Zëvendëskryeministri dhe ministri i Transportit në Qeveri, Aleksandar Nikolloski, në paraqitjen e tij sonte në edicionin qendror të lajmeve në televizionin Sitel, foli për marrëveshjen e arritur me Mbretërinë e Bashkuar.
Ajo që ndoshta nuk është e njohur për publikun, është se Mbretëria e Bashkuar nuk ka një marrëveshje të tillë me asnjë shtet tjetër në të gjithë Evropën Juglindore dhe Lindore, theksoi Nikolloski duke shtuar:
“Do të thotë se Maqedonia do të jetë shteti i parë me të cilin Mbretëria e Bashkuar do të nënshkruajë marrëveshje për bashkëpunim strategjik, dhe mendoj se kjo është një mesazh i qartë politik. Pozicioni i Maqedonisë si një kryqëzim i dy korridoreve panevropiane, korridori 10 dhe korridori 8, që ndërpriten pikërisht në Maqedoni, është një pozitë gjeostrategjike që ne duhet të jemi të mençur dhe ta shfrytëzojmë, dhe mendoj se në mënyrën më të mirë po e bëjmë këtë me këtë marrëveshje.”
Nikolloski informoi se janë arritur dy marrëveshje me Mbretërinë e Bashkuar – njëra është marrëveshje për partneritet strategjik midis Mbretërisë së Bashkuar dhe Maqedonisë, dhe tjetra, siç tha ai, është një marrëveshje unike.
“Marrëveshja e parë është për partneritet strategjik, e cila përcakton konturat politike të bashkëpunimit dhe përfshin bashkëpunim global, në mbrojtje dhe siguri, migrime, reforma në drejtësi, luftë kundër krimit të organizuar dhe korrupsionit, bashkëpunim ekonomik dhe zhvillim, të rinjtë, kulturën, arsimin, qeverisjen e mirë dhe sistemin gjyqësor. Kjo është pjesa politike e bashkëpunimit. Marrëveshja e dytë, e cila është unike dhe do të jetë marrëveshja më e madhe që Mbretëria e Bashkuar e ka arritur në aspektin financiar me ndonjë vend evropian, është marrëveshja Qeveri me Qeveri, midis Mbretërisë së Bashkuar dhe Maqedonisë, që përcakton saktësisht fushat e bashkëpunimit dhe thuhet qartë në nenin 1 se do të vendoset partneritet për mbështetje për realizimin e projekteve infrastrukturore, në shëndetësi, transport, teknologji, energji dhe sektorë të tjerë kritikë. Më tej, në nenin 3 të kësaj marrëveshjeje thuhet se Qeveria e Mbretërisë së Bashkuar, përmes mekanizmit të saj të financimit të jashtëm, vë në dispozicion një limit prej 5 miliardë funte për Maqedoninë, që në përkthim është rreth 6 miliardë euro,” informoi ekskluzivisht për TV Sitel zëvendëskryeministri Nikolloski.
Sipas Nikolloskit, kjo është një kornizë që ne mund ta shfrytëzojmë përmes këtij partneriteti.
“Por, ajo që për mua është shumë e rëndësishme, është se do të shkëmbehen edhe njohuri dhe praktika më të mira, të cilat do të sillen te ne nga shkencëtarë nga Mbretëria e Bashkuar, biznesmenë, njerëz nga administrata publike, nga shëndetësia, arsimi,” shtoi Nikolloski.
Ajo që është e rëndësishme është se përmes këtyre marrëveshjeve Maqedonia do të transformohet.
“Do të thotë, këto dy marrëveshje duhet ta transformojnë plotësisht Maqedoninë dhe ta çojnë në një nivel tjetër. Kjo nuk është një marrëveshje, siç u komentua sot, për huazim apo kredi – kjo është një marrëveshje që duhet ta transformojë Maqedoninë plotësisht si shoqëri, ta transformojë plotësisht si shtet, me qëllim jo vetëm rritjen e standardit të jetesës, por edhe përmirësimin e kushteve të përgjithshme të jetesës. Jo rastësisht për fillim i kemi zgjedhur dy sektorët më të rëndësishëm – transportin dhe shëndetësinë, për të cilët tashmë kemi marrëveshje,” theksoi Nikolloski.
Ai gjithashtu foli për kornizën e marrëveshjeve.
“Sa i përket kornizës që e kemi, ajo është një kornizë me afat të pakufizuar kohor. Askush nuk thotë se duhet t’i shfrytëzoni këto mjete deri në një afat të caktuar, dhe është një kornizë që nuk do të thotë se të gjitha mjetet do të përdoren, por në përputhje me nevojat që ka Maqedonia. Aktualisht kemi projekte të gatshme në vlerë rreth dy miliardë funte, që është diku rreth 2.2–2.3 miliardë euro, dhe këto janë projektet e para me të cilat do të nisim në periudhën që kemi përpara,” tha zëvendëskryeministri Nikolloski.
