Fondet e huaja të investimeve, të cilat po blejnë banesa në masë të madhe në Shkup, do ta rrisin edhe më shumë çmimin e metrit katror, i cili në metropol ka arritur deri në 3.000 euro. Këtë në emisionin “Biznes 21” e konfirmuan Ivica Jaqimovski, kryetar i Odës Ndërtimore pranë Lidhjes së Odave Ekonomike dhe Sllobodan Mitrovski nga Agjencia e Patundshmërive “Astoria”.
Një fond danez investimesh tashmë ka konfirmuar se ka blerë 250 banesa në ndërtim e sipër në lokacione atraktive në Shkup, ndërsa qëllimi i tyre është që për një kohë të shkurtër të arrijnë në 1.000 banesa.
”Gjithsesi do t’i rrisë çmimet. Vetë informacionet që dolën në publik – të cilat patjetër do të dilnin – do të sjellin një korrigjim të çmimit për lart, për fat të keq. Ai edhe tani është relativisht i lartë”, deklaroi Mitrovski.
”Nëse e shohim nga këndvështrimi i pyetjes suaj se kjo do të jetë arsyeja për rritjen e çmimeve të patundshmërive, në një masë është ashtu. Mirëpo, nga ana tjetër, kjo tregon se kemi një treg stabil të patundshmërive, marrë parasysh se analizat janë bërë nga fonde të nivelit evropian apo botëror”, tha Jaqimovski.
Mitrovski konsideron se fondet nuk i blejnë banesat për t’i lëshuar me qira, sepse kështu investimi nuk do t’u kthehej për 25 deri në 30 vjet, por i blejnë ato në fazën e ndërtimit për t’i shitur më pas me çmim më të lartë dhe për të fituar.
U hap edhe debati rreth ndërtimeve pa leje, por edhe problemi i qytetarëve të cilët me vite nuk mund të pajisen me fletëpjesë pronësie (tapi) për banesat që kanë blerë.
”Ka fletë pronësie, e sheh objektin, por unë e shoh në fund. Nëse ai objekt e ka nxjerrë kornizën lart në lartësi prej një metër e njëzet centimetra, çfarë bëjmë, a do të marrë fletë pronësie?”.
”Jo. Kemi problem, por ne atëherë e shohim. Dhe këtu duhet kapur ai që është investitori, sepse asgjë nuk mund të ikë rastësisht”, tha Mitrovski.
”Por, ne nuk kemi investitorë të tillë që kanë ndërtuar banesa dhe kanë ikur pasi kanë bërë diçka të tillë.”
”E si nuk kemi?”
”Nuk ka, kush është ai, hajde na thuaj?”
”Mirë tani.”
”Ja, në situatën e dhënë, cili është ai emër dhe mbiemër, ajo firmë që në vitet e fundit – e kam fjalën që kur gjithçka është rregulluar në mënyrë elektronike – cili është ai që ka bërë objekt dhe ka tejkaluar lejen.”
”Por thashë, nuk duhet të jetë patjetër në kohët e fundit, do të thotë nuk po them për kohët e fundit, por edhe kohët e fundit ka makinacione të ndryshme. Do të thotë ka. Ka…”.
Të dy bashkëbiseduesit janë decidivë se te çmimet e larta të metrit katror më së shumti ndikon mungesa e një strategjie shtetërore. Sipas tyre, nevojitet miratimi urgjent i Planeve Detaje dhe Gjenerale Urbanistike si dhe caktimi i lokacioneve për ndërtim, që të mund të bëhet një balancë, përkatësisht të ndërtohen edhe banesa me çmime më të ulëta për qytetarët.
