Gazetari dhe publicisti i mirënjohur shqiptar Artur Zheji ka ndërruar jetë në moshën 64-vjeçare, raportojnë mediat në Shqipëri.
Sipas raportimeve, rreth orës 16:00, ambulanca e Spitalit Rajonal Sarandë ka ndërhyrë pranë Restaurant Layos, në rrugën Butrinti, për t’i ardhur në ndihmë gazetarit.
Burimet mjekësore bëjnë me dije se i ndjeri kishte probleme shëndetësore dhe vuante nga diabeti.
Pavarësisht ndërhyrjes së shpejtë, ai ka ndërruar jetë gjatë transportit me ambulancë drejt spitalit.
Rreth orës 16:10 ambulanca e Spitalit Rajonal Sarandë ka marr në afërsi të Restaurant Layos në rrugën Butrinti shtetasin Artur Petro Zheji i datëlindjes 26.09.1961 banues në Tiranë, i cili kishte probleme shendetesore. Ky shtetas ka ndërruar jetë gjatë transportit me Ambulancë.
Pjesa më e madhe e brezit të ri e njihte Artur Zhejin si një nga gazetarët dhe një nga analistët më në zë të ekranit shqiptar, i cili në çdo studio televizive spikaste për opinionet e tij.
Ndërkohë fillimet e Artur Zhejit datojnë me artin, lidhja me të cilin pa dyshim ka qenë nëna e tij, aktorja e mirënjohur Besa Imami.
Artur Zheji u diplomua për regjizurë në Institutin e Lartë të Arteve, ku spikati dhe la gjurmën e tij në dramaturgjinë shqiptare.
Teksa diplomohej, ne skenën e Teatrit Kombërar u vu në skenë drama e tij “Raimonda”, e cila u interpretua nga emra të mëdhenj të skenës.
Më pas karriera e tij mori një drejtim tjetër, u largua drejt Italisë ku qëndroi për rreth 10 vite dhe punoi në një nga radiot më të mëdha italiane “Radio Radicale” si specialist i çështjeve të Evropës dhe Ballkanit.
Pas kësaj eksperience të vyer analisti u rikthye në Shqipëri për të dhënë kontributin e tij në gazetari dhe publicistikë, ku shpalosi artin e tij të fjalës.
