Ministri për Çështje Evropiane, Orhan Murtezani, e nisi mëngjesin e sotëm vizitën e tij zyrtare në Francë me një takim me ministrin francez të obliguar për Çështje Evropiane në Ministrinë për Evropën dhe Punët e Jashtme të Francës, Benjamin Haddad.
Në qendër të bisedimeve mes dy ministrave ishte përforcimi i partneritetit ndërmjet Maqedonisë së Veriut dhe Francës, në kontekstin e realitetit të ri gjeopolitik, ku integrimi evropian, stabiliteti dhe qëndrueshmëria e rajonit marrin një rëndësi të shtuar.
Ministri Murtezani theksoi përkushtimin e vendit për një partneritet të qëndrueshëm dhe demokratik me Francën, duke vënë në pah rëndësinë e reformave të brendshme, bashkëpunimit rajonal si dhe avancimit të perspektivës evropiane të Maqedonisë së Veriut.
Ai gjithashtu riafirmoi se mbështetja e Francës mbetet thelbësore për progresin e përbashkët dhe konsolidimin me sukses të Evropës në një kohë me sfida të shumta politike dhe të sigurisë në kontinent.
