Gazetari dhe kryeredaktori i portalit Infomax, Aleksandar Mitovski, ka raportuar se gjatë natës së kaluar redaksia dhe shtëpia e tij janë bërë cak i një sulmi të organizuar nga një person i panjohur. Sipas deklaratave të tij, sulmuesi ka hyrë me forcë në dy lokacione të ndryshme, duke shkaktuar dëme materiale dhe duke provuar të vjedhë pajisje dhe dokumente.
Mitovski deklaroi se i gjithë incidenti është i regjistruar nga kamerat e sigurisë, të cilat sipas tij dëshmojnë qartë hyrjen e dhunshme dhe veprimet agresive të personit. Ai e ka përshkruar sulmuesin si “një idiot i partisë”, duke nënkuptuar se sulmi mund të ketë qenë i motivuar politikisht.
“Redaksia ime dhe shtëpia ime janë sulmuar. Kjo nuk është rastësi. Jam i bindur se qëndrojnë struktura politike prapa këtij akti, të cilat duan të më frikësojnë për shkak të raportimit tim”, ka deklaruar Mitovski, duke shtuar se rasti do t’u përcillet edhe përfaqësive diplomatike të huaja në vend.
Nga Ministria e Punëve të Brendshme është konfirmuar se policia ka reaguar menjëherë pas raportimit të incidentit dhe se janë ndërmarrë masat e para hetimore. Megjithatë, deri tani nuk është publikuar asnjë informacion zyrtar për identifikimin ose arrestimin e të dyshuarit.
Ky incident ka shkaktuar reagime të gjera në opinion, veçanërisht në lidhje me sigurinë e gazetarëve dhe presionin ndaj mediave në vend. Mitovski kërkon një hetim të thelluar dhe ndëshkim të autorëve, duke theksuar se sulme të tilla përbëjnë kërcënim serioz për lirinë e fjalës.
