Të nderuar qytetarë, të nderuar media,
Ne e dënojmë ashpër gjuhën e turpshme, përçmuese, të mbushur me mizogjni dhe urrejtje që ditëve të fundit përhapet në rrjetet sociale dhe është e drejtuar ndaj anëtares sonë dhe kandidates për këshilltare në Këshillin e Qytetit të Shkupit, Luna Stefanoska.
Ky lloj sulmi, i cili nuk ka të bëjë me kritika të bazuara në qëndrime politike apo paraqitje publike, por është i reduktuar në ofendime personale, komente seksiste dhe degradim të gruas si individ, paraqet kërcënim jo vetëm për lirinë e shprehjes, por edhe për dinjitetin e çdo gruaje që përpiqet të bëhet pjesë e jetës publike dhe politike.
Ndërkohë që nga njëra anë të gjithë përpiqemi t’i përfshijmë të rinjtë në jetën shoqërore dhe të shfrytëzojmë potencialin e çdo individi të ri, nga ana tjetër pothuajse nuk ka rast kur të rinjtë – veçanërisht gratë apo vajzat – nuk përballen me një sulm të tillë ose të ngjashëm. Gratë në politikë përballen çdo ditë me pengesa, por kur këto sulme vijnë në formën e gjuhës së hapur të urrejtjes, atëherë kemi të bëjmë me një alarm që nuk duhet injoruar.
Ju bëj thirrje të gjithëve – qytetarëve, organizatave për të drejtat e grave, partive politike, kandidatëve për kryetarë komunash, bartësve të listave për këshilltarë, Komitetit të Helsinkit dhe të gjitha shoqatave qytetare që luftojnë kundër diskriminimit dhe gjuhës së urrejtjes – të marrin një qëndrim të qartë dhe publikisht ta dënojnë këtë sulm.
Kjo nuk është vetëm një sulm ndaj një gruaje apo një vajze, ky është sulm ndaj të gjithë atyre që kanë vendosur të mos heshtin, të jenë aktivë dhe të luftojnë për ndryshim. Lufta jonë kundër gjuhës së urrejtjes nuk do të ndalet, dhe mbështetja për Lunën tonë është e pakushtëzuar.
Në një kohë kur si shoqëri duhet të ndërtojmë tolerancë, dialog dhe barazi, çdo rast i tillë duhet të dënohet publikisht dhe të sanksionohet institucionalisht.
Ju faleminderit.
