Zëvendëskryeministri i parë, Izet Mexhiti, ka komentuar zhvillimet e fundit politike që lidhen me Aleancën për Shqiptarët (ASH) dhe lëvizjet e Arben Taravarit. Në një prononcim për media, Mexhiti tha se ndarja e ASH-së është pasojë e gabimeve të vetë lidershipit, duke kujtuar bashkëpunimet e Taravarit me BDI-në edhe gjatë mandatit të kaluar.
“Pse u përça ASH-ja? Pse sot kemi tri Aleanca? Këto pyetje duhet t’i bëhen atyre që sot përpiqen ta justifikojnë kalimin te BDI,” tha Mexhiti, duke iu referuar deputetëve dhe strukturave që së fundmi janë rreshtuar përkrah Taravarit.
Sipas tij, elektorati i ASH-së është mjaftueshëm i vetëdijshëm dhe nuk do të ndjekë verbërisht liderët që kalojnë nga njëra parti në tjetrën. “Taravari përfundoi te BDI, por elektorati i tij jo. Votuesit e Aleancës mbeten të vendosur kundër BDI-së dhe nuk mund të transferohen me një vendim personal,” theksoi ai.
Mexhiti solli ndërmend edhe rastet kur, si ministër i Shëndetësisë, Taravari kishte nënshkruar marrëveshje ndërkombëtare me mbështetjen e qeverisë së atëhershme, duke treguar se bashkëpunimi me BDI-në nuk është diçka e re për të.
Ai vlerësoi se koha ka dëshmuar se ndryshimi nuk mund të vijë duke iu bashkuar strukturave të vjetra politike, por vetëm duke ndërtuar një alternativë të re. “Elektorati nuk mashtrohet më lehtë. Qytetarët kanë kujtesë politike dhe dinë të dallojnë kush e tradhton besimin e tyre,” përfundoi Mexhiti.
