Mbi 60 mijë qytetarë janë paraqitur deri më tani për vaksinim kundër gripit sezonal, ndërsa mbi 8 mijë persona tashmë janë imunizuar. Momentalisht procesi i vaksinimit në vend po zhvillohet me dinamikë të mirë dhe me interesim të qytetarëve, sidomos të atyre që i përkasin kategorive më të rrezikuara nga gripi sezonal.
Imunizimi realizohet në gjithsej 35 pika vaksinimi të shpërndara në të gjithë territorin e vendit. Për të lehtësuar procesin, Ministria ka mundësuar që qytetarët të paraqiten për vaksinim në mënyrë të thjeshtë dhe efikase, përmes aplikacionit vakcinacija.mk, apo përmes mjekëve të tyre amë, që kujdesen për koordinimin dhe regjistrimin e pacientëve në sistem.
Vaksinimi kundër gripit sezonal ofrohet falas për disa kategori të caktuara të popullsisë, të cilat konsiderohen më të ndjeshme dhe më të ekspozuara ndaj komplikimeve të mundshme nga gripi. Këtu përfshihen personat mbi 65 vjeç, personat me sëmundje kronike, punonjësit shëndetësorë, gratë shtatzëna, fëmijët e moshës nga 6 muaj deri në 5 vjeç, si dhe personat që jetojnë në institucione për përkujdesje sociale të të moshuarve, përfshirë edhe punonjësit e këtyre institucioneve. Qëllimi i këtij programi është të parandalojë përhapjen e virusit të gripit, të zvogëlojë rastet e rënda dhe të ulë ngarkesën mbi sistemin shëndetësor gjatë sezonit të dimrit.
Gjithashtu, në organizim të Ministrisë, ekipe preventive nga institucionet shëndetësore në të gjithë vendin kanë filluar vaksinimin kundër gripit sezonal në kushte shtëpie. Kjo nismë përfshin personat e moshuar, të palëvizshëm, si dhe personat me aftësi të kufizuara.
Autoritetet shëndetësore apelojnë tek qytetarët që paraqiten për vaksinim, pasi mbrojtja është më efektive kur vaksina merret para fillimit të përhapjes masive të gripit gjatë muajve të ftohtë. /Alsat.mk
