Marilyn Monroe, një nga ikonat më të pavdekshme të historisë së kinemasë botërore, u shfaq për herë të fundit në ekranin e madh në filmin “The Misfits” (1961), një projekt që sot shihet si një pasqyrë e dhimbshme e fundit të jetës së saj.
Filmi, i drejtuar nga regjisori John Huston dhe me skenar të shkruar nga Arthur Miller, bashkëshorti i atëhershëm i Monroe, u realizua në një periudhë tejet të vështirë për aktoren. Gjatë xhirimeve në shkretëtirën e Nevadës, Monroe përballej me probleme të rënda shëndetësore, varësi nga medikamentet dhe presion të jashtëzakonshëm emocional.
Në “The Misfits”, Monroe interpreton rolin e Roslyn Taber, një grua e ndjeshme dhe e brishtë që ndodhet mes burrave të thyer nga jeta një personazh që shumë kritikë e kanë konsideruar si reflektim të drejtpërdrejtë të gjendjes së saj shpirtërore. Performanca e saj u vlerësua si një nga më të ndjerat dhe më autentiket e karrierës.
Filmi përfshinte gjithashtu emra legjendarë si Clark Gable dhe Montgomery Clift, të cilët, ashtu si Monroe, po kalonin periudha të vështira personale. Ironikisht, “The Misfits” do të ishte edhe filmi i fundit i plotë për Clark Gable, i cili ndërroi jetë pak pas përfundimit të xhirimeve.
Pas publikimit të filmit në vitin 1961, Marilyn Monroe nuk arriti më të realizonte një tjetër film artistik të plotë. Më 5 gusht 1962, vetëm një vit më vonë, ajo u gjet e pajetë në shtëpinë e saj në Los Anxhelos, në moshën 36-vjeçare. Vdekja e saj u shpall zyrtarisht si mbidozë nga barbituratet, por rrethanat mbetën të diskutueshme dhe vazhdojnë të ushqejnë teori të shumta edhe sot e kësaj dite.
“The Misfits” mbetet kështu jo vetëm filmi i fundit i Marilyn Monroe, por edhe një dëshmi artistike e një gruaje që, pas glamurit dhe famës botërore, mbante mbi supe një peshë të madhe emocionale. Me kalimin e dekadave, filmi është rivlerësuar si një vepër e thellë ekzistenciale dhe si lamtumira e heshtur e një ylli që vazhdon të magjepsë botën.
Marilyn Monroe mbetet edhe sot simbol i bukurisë, brishtësisë dhe tragjedisë së famës një ikonë që nuk u shua kurrë, pavarësisht fundi të saj të parakohshëm./KultPlus.com
