Kryeministri i Republikës së Kosovës, Albin Kurti, ka përkujtuar masakrën e 1 prillit 1999 në fshatin Lybeniq të Pejës.
Sipas tij, në orët e mëngjesit të asaj dite, forcat serbe rrethuan fshatin dhe dëbuan banorët nga shtëpitë e tyre. Ata u grumbulluan pranë xhamisë, ku gratë, fëmijët dhe të moshuarit u ndanë dhe u larguan me forcë, ndërsa 59 burra u vranë me armë automatike.
Kurti theksoi se drejtësia për këtë krim në Serbi ka qenë e vonuar dhe e paplotë, duke shtuar se e vërteta për këto ngjarje vazhdon të dokumentohet.
Ai vuri në dukje se Kosova sot është një shtet i lirë dhe demokratik, që synon anëtarësimin në Bashkimin Evropian dhe NATO, ndërsa institucionet janë duke forcuar kapacitetet në siguri dhe drejtësi.
Po ashtu, ai theksoi se mbështetja për familjet e viktimave dhe dokumentimi i krimeve të luftës mbeten prioritet institucional.
