Katari ka arrestuar 313 persona për dyshime abuzimi me mediat sociale, postim videosh dhe përhapje informacioni të rremë, duke i bërë thirrje publikut të përmbahet nga regjistrimi i videove, postimi i materialeve vizuale ose përhapja e “thashethemeve që lidhen me situatën aktuale”, raporton ARN.
“Arrestimet u kryen për shkarkim dhe shpërndarje të videove të paautorizuara, përhapje të informacionit dhe thashethemeve të rreme, si dhe publikim të përmbajtjes me qëllim shkaktimin e shqetësimit tek publiku”, tha Ministria e Brendshme e vendit në një deklaratë.
Ministria e Brendshme e Katarit ka rekomanduar që qytetarët të marrin informacion ekskluzivisht nga “burime zyrtare të miratuara”.
Katari nuk është i vetmi vend që kërkon të kontrollojë mënyrën e shpërndarjes së informacionit gjatë konfliktit.
Në Izrael, censura ushtarake – e cila përqendrohet më shumë në mediat ndërkombëtare sesa në mediat sociale – e ka bërë të qartë se transmetimi i çdo imazhi që zbulon vendndodhjen e raketave interceptuese ose instalimeve ushtarake të goditura nga zjarri armik është i ndaluar.
Në të njëjtën kohë, në Ukrainë zbatohen rregulla të rrepta, për shembull, në lidhje me transmetimin e informacionit në lidhje me tërheqjen e trupave ukrainase ose detajet e çdo lëvizjeje të rëndësishme të automjeteve të blinduara ose sistemeve të armëve në vijën e frontit.
