Për herë të parë në historinë e saj, shtëpia franceze e modës Jacquemus ka emëruar një ambasadore zyrtare të markës dhe zgjedhja ka qenë sa simbolike, aq edhe emocionale.
Ambasadorja e parë e Jacquemus është Liline, gjyshja e themeluesit të markës, Simon Porte Jacquemus, e cilësuar nga vetë Maison-i si “ikona origjinale” e stilit të saj.
E lindur në vitin 1946 dhe e rritur në fshatin mesdhetar Alleins, në jug të Francës, Liline ka qenë prej vitesh një figurë frymëzuese për stilistin. Jacquemus ka folur shpesh publikisht për ndikimin e saj të drejtpërdrejtë në formimin e vizionit estetik dhe emocional të markës.
Sipas tij, forca, thjeshtësia, eleganca natyrore dhe autenticiteti i gjyshes së tij mishërojnë thelbin e feminitetit që Jacquemus synon të përcjellë përmes koleksioneve një feminitet i lirë, i ndershëm dhe larg rregullave tradicionale të modës.
Ky vendim shënon një moment të veçantë për shtëpinë franceze, e njohur për qasjen e saj jo konvencionale, intime dhe personale ndaj modës, duke e kthyer historinë familjare në pjesë të identitetit të markës.
Chartreuse, ngjyra që pritet të dominojë vitin 2026
Ndërkohë, ekspertët e modës parashikojnë se chartreuse, një nuancë e gjelbër e ndezur dhe energjike, do të jetë ngjyra më në trend e vitit 2026.
Kjo ngjyrë e veçantë pritet të dominojë pasarelat dhe koleksionet e ardhshme, duke u konsideruar jo vetëm si zgjedhje estetike, por edhe si një shprehje e vetëbesimit dhe guximit personal.
Sipas stilistëve, chartreuse krijon një pamje moderne, të freskët dhe plot energji, ndërsa ata që e zgjedhin dallohen menjëherë për origjinalitetin dhe qëndrimin e fortë stilistik.
Viti 2026, sipas sinjaleve të para nga bota e modës, do të jetë një vit ku individualiteti, ngjyrat e forta dhe identiteti personal do të jenë në qendër të vëmendjes./KultPlus.com
