Zeqirija Ibrahimi, një figurë e njohur për integritetin intelektual dhe përkushtimin ndaj reformave thelbësore në vend. Nën udhëheqjen e tij, AlternAtivA është bërë një prej shtyllave të koalicionit opozitar #VLEN,
Ibrahimi, i zgjedhur si kryetar i AlternAtivA-s në korrik 2024, ka premtuar ndryshim të vërtetë dhe jo vetëm rotacion pushtetesh. Në deklaratat e tij të fundit, ai ka theksuar se AlternAtivA synon të rikthejë besimin e qytetarëve në politikë përmes transparencës, reformave të thella dhe përfaqësimit dinjitoz të shqiptarëve.
“Koalicioni #VLEN është më shumë se bashkim partish; është një projekt për ringjalljen e shpresës,” ka deklaruar Ibrahimi. Ai ka shtuar se koalicioni synon të jetë zëri i qytetarëve të zhgënjyer dhe platforma e të rinjve që kërkojnë mundësi dhe drejtësi.
Një nga prioritetet e AlternAtivA-s është përmirësimi i arsimit dhe shëndetësisë, de-politizimi i administratës, si dhe krijimi i kushteve për zhvillim ekonomik në zonat shqiptare. Ibrahimi ka paralajmëruar se pjesëmarrja në qeveri nuk do të jetë “pjesëmarrje dekori”, por një përpjekje serioze për të çuar përpara kauzat shqiptare.
Kush është Zeqirija Ibrahimi?
Zeqirija Ibrahimi lindi më 14 qershor 1977 në Shkup. Ai është doktor i shkencave filologjike, profesor universitar dhe njohës i thellë i gjuhës dhe kulturës shqiptare. Me përvojë akademike dhe politike, Ibrahimi ka qenë deputet, përkthyes, redaktor dhe një nga themeluesit e Lëvizjes BESA. Pas ndarjes nga ajo lëvizje, ai themeloi dhe udhëheq AlternAtivA-n, të cilën e ka kthyer në një forcë relevante politike.
Ai është vlerësuar si një nga zërat më kritikë ndaj keqqeverisjes dhe një nga ideologët modernë të politikës shqiptare në Maqedoninë e Veriut, duke sjellë një qasje të re që mbështetet më shumë në ide dhe vlera sesa në interesa klanore apo partiake.
E ardhmja?
Në një klimë politike ku dominon pasiguria dhe zhgënjimi, AlternAtivA dhe lideri i saj duket se po fitojnë gjithnjë e më shumë besim. Sfida është e madhe, por edhe pritshmëritë janë të larta. Me një profil të veçantë intelektual dhe politik, Zeqirija Ibrahimi ka gjasë të mbetet një prej figurave kyçe të politikës shqiptare në vitet që vijnë.
