Një ngjarje aspak e zakonshme ka ndodhur më 2 tetor 2025, gjatë ceremonisë së hapjes së Institutit të Hifzit në Strugë. Hafizi dhe hoxha i diplomuar në Universitetin Islamik të Medinës, Sabahudin Zeqiri, ka reaguar publikisht pasi iu ndalua pjesëmarrja në këtë ngjarje që, sipas tij, duhej të ishte ditë gëzimi për të gjithë besimtarët.
Në një prononcim të ndjerë, Zeqiri tregon se ishte përgatitur me dashuri për të uruar personalisht Muftiun e Strugës, madje kishte përgatitur edhe një mirënjohje zyrtare. Por një telefonatë e befasishme ia ndryshoi ditën.
“Më thanë se nuk isha i mirëseardhur dhe se nuk donin të më shihnin aty. U shtanga… pyesja veten: çfarë mëkati kam bërë që të më përjashtojnë nga një ngjarje kaq e rëndësishme për qytetin tim?”, u shpreh ai.
Pavarësisht lëndimit, ai zgjodhi të mos shkaktojë përçarje dhe qëndroi larg. Megjithatë, përmes disa vëllezërve, ai tentoi t’ia dorëzojë mirënjohjen Muftiut Adi Murtishi – edhe ajo u refuzua.
“Zemra ime u thye edhe më shumë…”, shkruan Hafizi.
Në vend të kësaj, ai vizitoi fshatin Llabunishtë, ku po zhvillohej zgjerimi i xhamisë “Mehmed Pasha”. Aty u prit me ngrohtësi dhe respekt nga besimtarët lokalë, një kontrast i fortë me përvojën që kishte përjetuar në qytetin e tij.
Ai përmbylli reagimin me një thirrje për reflektim dhe falje:
“Si mund të ketë bereqet një institut i Kur’anit, ku nuk janë të mirëseardhur hafizët dhe hoxhallarët, ndërsa përqafohen më tepër figura joislame? Nga unë, të gjithë e keni hallall. O Zot, fale popullin tim, ngase ata nuk dinë!”
Ky rast ka ngritur pikëpyetje dhe shqetësime në opinionin fetar të rajonit, duke sjellë në vëmendje nevojën për unitet dhe respekt mes vetë udhëheqësve shpirtërorë në shërbim të besimit dhe komunitetit.
