Sot, Tetova u mbush me dhimbje, lot dhe nderime për artistin e njohur Shpat Kasapi, i cili u përcoll për në banesën e fundit. Personalitete të larta politike, artistë, producentë, aktorë dhe miq të shumtë nga të gjitha trevat shqiptare udhëtuan drejt Tetovës për t’i dhënë lamtumirën një prej emrave më të dashur të skenës muzikore.
Në ceremoninë e varrimit morën pjesë figura të njohura të artit dhe kulturës, të cilët me emocion dhe respekt kujtuan jetën dhe karrierën e Shpat Kasapit, duke shprehur mbështetjen e tyre edhe për familjen në këto momente të vështira.
Në mesin e të pranishmëve u panë kreu i BDI Ali Ahmeti me bashkëpunëtor, kreu i komunës Bilall Kasami dhe nënkryetari Albi Qamili, zëvendësministri i Kulturës Sedat Sulejmani, deputeti Oliver Spasovski, ish sekretari i qeverisë Muhamed Zekiri, biznesmeni dhe filantropi Lazim Destani, aktori dhe producenti Blerim Destani, si dhe figura të njohura të skenës kombëtare si Xhevdet Jashari, këngëtari Bekim Rexhepi, aktori Muzbajdin Qamili, producenti Nurteel, si dhe këngëtarët Bes Kallaku, Big Mama, Tuna, Dafina Zeqiri, Blero, Adelina Tahiri, Albulena Ukaj, Rovena Stefa, Erik Lloshi, por edhe shumë të tjerë.
Në ceremoni mori pjesë edhe stilisti i njohur Armend Ramadani, aktori Drilon Hoha, moderatorja Xhuli Nura dhe prezantuesi Shpëtim Desku, të gjithë duke shprehur ngushëllimet e tyre për humbjen e një kolegu dhe shoku të dashur.
Atmosfera ishte e rënduar dhe plot emocion. Artistë, miq dhe familjarë vunë në pah karakterin e tij të veçantë, modestinë dhe talentin, duke theksuar se Shpati la gjurmë të pashlyeshme në muzikën shqiptare dhe në zemrat e publikut.
Përcjellja e tij e fundit bashkoi botën politike, artistike dhe qytetarët, duke dëshmuar edhe një herë ndikimin dhe respektin e madh që Shpat Kasapi gëzonte ndër vite.
Ngushëllimet më të sinqerta familjes Kasapi, ndërsa kujtimi për Shpatin do të mbetet i paharruar.
