Zëvendëskryeministri për Qeverisje të Mirë, Arben Fetai, ka nisur një vizitë zyrtare disa-ditëshe në Nju Jork dhe Washington D.C., ku pritet të zhvillojë takime të nivelit të lartë me përfaqësues të institucioneve amerikane, me zyrtarë të Kombeve të Bashkuara si dhe me përfaqësues të komunitetit shqiptar nga Maqedonia e Veriut që jetojnë në SHBA, përcjell Fol
Në hyrje të vizitës së tij, ai ka ndarë edhe një moment të veçantë nga Staten Island, ku mori pjesë në ngjarjen kushtuar nismës për emërtimin e rrugës “Isa Boletini Way”.
Sipas Fetait, kjo nismë përbën një akt simbolik që nderon historinë, rezistencën dhe identitetin kombëtar të shqiptarëve në diasporë.
Postimin i Fetait:
“Në Staten Island të Nju Jorkut, pata kënaqësinë të jem pjesë e një mbrëmjeje të veçantë kushtuar nismës për emërtimin e rrugës “Isa Boletini Way”, një akt simbolik që nderon historinë, rezistencën dhe identitetin tonë kombëtar edhe përtej Atlantikut.
Së bashku me ministrin e qeverisë së Kosovës dhe kryetarin e sapozgjedhur të Mitrovicës, Faton Peci, si dhe ministrin e qeverisë së Malit të Zi, Fatmir Gjeka, dëshmuam edhe një herë se bashkimi rreth vlerave kombëtare, kulturës dhe historisë sonë është forca që na mban të lidhur kudo që ndodhemi.
Mbrëmja u mbajt në Albanian Cultural Center Staten Island, me pjesëmarrje të gjerë të shoqatave të mërgatës sonë, e cila vazhdon të jetë faktor i rëndësishëm i promovimit të vlerave tona dhe i miqësisë tonë të përhershme me SHBA-të”, përfundon Fetai./Fol.mk/
