Shkruan: Anila Pajaziti
Dr. Adelina Ameti, me origjinë nga Kumanova dhe e lindur në Lausanne të Zvicrës, është një nga emrat e rinj që po lënë gjurmë të dukshme në mjekësinë zvicerane.
E bija e prindërve që kishin emigruar vite më parë si punëtorë sezonalë, sot ajo përfaqëson shembullin më të mirë të brezit të dytë të diasporës shqiptare që po arrin majat e suksesit përmes dijes, përkushtimit dhe humanizmit profesional.
Pas përfundimit të studimeve në Universitetin e Lausannës (UNIL) dhe trajnimeve të shumta në Qendrën Spitalore Universitare Vaudoise (CHUV), Dr. Ameti mban sot titullin FMH në Endokrinologji, Diabetologji dhe Mjekësi të Brendshme, dhe ushtron funksionin e Shefes Klinike (Médecin Cheffe de Clinique) në shërbimin e endokrinologjisë, diabetologjisë dhe metabolizmit në CHUV.
Sipas verifikimeve në të gjitha bazat publike të mjekëve në Zvicër (CHUV, HUG, FMH, Comparis, OneDoc, Doctena dhe Albinfo.ch), Dr. Adelina Ameti është aktualisht e vetmja mjeke shqiptare me këtë specializim të trefishtë që punon në një spital universitar zviceran.
Në punën e saj të përditshme, ajo njihet për qasje profesionale, humane dhe të bazuar në dëgjim aktiv ndaj pacientëve, duke i vendosur ata në qendër të çdo vendimi klinik. Për Dr. Ametin, mjekësia është një bashkim i shkencës, etikës dhe empatisë.
“Jam thellësisht mirënjohëse për prindërit e mi që sakrifikuan gjithçka për të na dhënë mundësi që ata vetë nuk i patën. Forca dhe shembulli i tyre më kanë udhëhequr në çdo hap të jetës sime,” – thekson Dr. Ameti.
Kontribut shkencor dhe botime ndërkombëtare
Përveç punës klinike, Dr. Ameti ka një aktivitet të pasur kërkimor. Ajo është autore dhe bashkautore e pesë publikimeve shkencore, të botuara në revista mjekësore ndërkombëtare dhe zvicerane, përfshirë edhe dy në SHBA, të cilat trajtojnë tema të rëndësishme të endokrinologjisë moderne.
Disa prej tyre janë:
- 2025 – “Diabeti gestacional i hershëm: nga pasiguria diagnostike te menaxhimi”, Revue Médicale Suisse
Artikull që trajton sfidat klinike të diagnostikimit të hershëm të diabetit gjatë shtatzënisë.
Lexo më shumë - 2025 – “Hypertension in a Patient with Polycystic Kidney Disease Complicated by Pheochromocytoma”, AACE Clinical Case Reports (USA)
Rast klinik që përshkruan një kombinim të rrallë patologjish endokrine.
Lexo më shumë - 2024 – “Les nouveautés en endocrinologie en 2023”, Revue Médicale Suisse
Përmbledh risitë më të fundit shkencore në endokrinologji dhe diabetologji.
Lexo më shumë - 2022 – “Possible Link Between Anabolic Steroid Abuse and Pituitary Apoplexy: A Case Report”, Frontiers in Endocrinology
Studim mbi ndikimin e steroideve anabolike në shëndetin hormonal dhe pasojat klinike.
Punimet e saj janë prezantuar edhe në konferenca ndërkombëtare në Zvicër dhe Evropë, duke e pozicionuar Dr. Ametin si një zë të ri në komunitetin shkencor evropian.
Krenari shqiptare në diasporë
Me profesionalizëm të lartë, përkushtim njerëzor dhe arritje të njohura në nivel ndërkombëtar, Dr. Adelina Ameti është bërë një emër i respektuar i mjekësisë zvicerane dhe një model frymëzues për të rinjtë shqiptarë që synojnë suksesin përmes dijes dhe etikës.
Rrënjët e saj nga Kumanova, të shkrira me edukimin e marrë në Zvicër, përfaqësojnë më së miri frymën e bashkimit mes identitetit shqiptar dhe përparimit modern evropian.(INA)
