Në një intervistë të veçantë për ora24.tv, mësuesja e klasave të ulëta Zerije Saiti ndan përkushtimin, pasionin dhe dashurinë që e shoqërojnë çdo ditë në rrugëtimin e saj profesional me fëmijët.
Ajo tregon se zgjedhja për të punuar me më të vegjlit nuk ishte rastësi. “Gjithmonë kam pasur dëshirë të kaloj kohë me fëmijë. Kureshtja e tyre dhe mundësia për t’i ndihmuar të mësojnë më kanë shtyrë të ndjek ëndrrën për t’u bërë mësuese,” shprehet Saiti.
Në klasën e saj, çdo ditë është një histori më vete. Edhe pse nuk mund të veçojë vetëm një moment, ajo thekson se buzëqeshjet dhe arritjet e vogla të nxënësve janë emocionet më të mëdha që përjeton çdo ditë.
Për ta bërë mësimin më tërheqës, Zerije Saiti përdor metoda kreative dhe bashkëkohore. Ajo kombinon materiale vizuale dhe dëgjimore, video, tregime dhe aktivitete praktike, duke e kthyer procesin e të nxënit në një përvojë argëtuese dhe të kuptueshme për fëmijët.
Sipas saj, fëmijët më së shumti i tërheqin aktivitetet që përfshijnë lëvizje dhe imagjinatë. Lojërat si plotësimi i tregimeve, dramatizimet dhe aktivitetet artistike janë ndër më të preferuarat, pasi nxisin kreativitetin dhe bashkëpunimin.
Edhe pse profesioni i mësuesit shpesh shoqërohet me sfida, ajo shprehet se nuk ka hasur vështirësi të mëdha, duke e parë çdo ditë si një mundësi për të ndikuar pozitivisht në jetën e fëmijëve.
Motivimi i saj kryesor mbetet zhvillimi i nxënësve: “Çdo fëmijë ka potencial unik. T’i shohësh si rriten dhe fitojnë vetëbesim është kënaqësia më e madhe,” thotë ajo për ora24.tv.
Një ditë në klasën e saj nis me aktivitete që zgjojnë interesin e fëmijëve, vazhdon me mësime të ndërthurura me lojëra dhe përfundon me një reflektim të përbashkët në një atmosferë pozitive.
Në fund të intervistës, kur i kërkohet ta përshkruajë profesionin me një fjalë të vetme, përgjigjja e saj është e qartë dhe e fuqishme: “Dashuri.” Sepse, sipas Zerije Sait mësimdhënia nuk është vetëm profesion – është mision për të ndërtuar të ardhmen.
