Drejtoria e të Ardhurave Publike (DAP) i përkujton të gjithë personat juridikë dhe fizikë të cilët deri në dhjetor të vitit 2024, kanë realizuar qarkullim të përgjithshëm më të lartë se 2.000.000 denarë nga kryerja e qarkullimit të të mirave dhe shërbimeve, se kanë për detyrë që të parashtrojnë Formular për regjistrim për qëllim të tatimit të vlerës së shtuar (formulari TVSH-01).
Nëse si person fizik merrni me qira hapësirë afariste në vend, ofroni shërbime menaxheriale, juridike, ekonomike, inxhinierike, artizanale, jepni orë private për nxënës dhe studentë, realizoni të ardhura nga shitja e produkteve bujqësore ose kryeni qarkullim tjetër dhe në vitin 2024 keni realizuar qarkullim mbi 2.000.000 denarë duhet të regjistroheni për qëllimet e TVSH-së, theksojnë nga DAP.
Qarkullim i përgjithshëm për qëllimet e TVSH-së është qarkullimi të cilin e ka bërë tatimpaguesi gjatë vitit në bazë të shitjes së të mirave dhe shërbimeve.
Në qarkullim të përgjithshëm nuk hyn qarkullimi i cili është liruar nga TVSH pa të drejtë të heqjes së tatimit paraprak, si për shembull: marrja me qira e objekteve banesore dhe ndërtesa për jetesë, shërbime të sigurimit dhe risigurimit, shërbime shëndetësore, shërbime për mësimin e gjuhëve të huaja, shërbime të qendrave kompjuterike, transport ndërkombëtar i udhëtarëve, etj.
Gjithashtu në qarkullim të përgjithshëm nuk hyn edhe qarkullimi i cili kryhet ndaj tatimpaguesve të huaj dhe i cili nuk i nënshtrohet tatimit me TVSH si për shembull: kryerje e shërbimeve konsulentë, avokatie, TI dhe shërbime të tjera ndaj tatimpaguesve të huaj.
Nëse tatimpaguesi ka kryer aktivitetin e tij vetëm në një pjesë të vitit kalendarik, qarkullimi total vjetor për qëllime të TVSH-së llogaritet në atë mënyrë që merret qarkullimi i përgjithshëm i realizuar për muajt kur keni kryer aktivitetin, duke e pjesëtuar me numrin e muajve të funksionimit dhe shumëzuar me dymbëdhjetë me çka fitohet qarkullimi i përgjithshëm vjetor”, shpjegojnë nga DAP.
