Në historinë e rezistencës shqiptare në Kosovë, beteja e marsit 1998 në Prekaz mbetet një nga momentet më të dhimbshme dhe më të lavdishme. Aty, krahas komandantit legjendar Adem Jashari, qëndruan edhe shumë anëtarë të familjes së tij, mes tyre edhe djali i vëllait, i riu Besim Hamëz Jashari, përcjell INA.
Besimi ishte ende fëmijë vetëm 16 vjeç, por dëshmitë e asaj kohe tregojnë se ai nuk qëndroi i fshehur. Në ditët e rrethimit të familjes Jashari nga forcat serbe, ai doli në pozicion mbrojtjeje përkrah babait të tij, Hamëz Jashari, dhe anëtarëve të tjerë të familjes.
Sulmi ndaj familjes Jashari filloi më 5 mars 1998 dhe zgjati tre ditë. Forca të mëdha policore dhe ushtarake serbe rrethuan shtëpitë e Jasharëve në përpjekje për ta eliminuar Adem Jasharin dhe strukturën e parë të rezistencës së armatosur shqiptare në Kosova.
Brenda kompleksit të shtëpive ndodheshin dhjetëra anëtarë të familjes – burra, gra dhe fëmijë. Ata refuzuan të dorëzoheshin dhe qëndruan në rezistencë deri në fund.
Më 7 mars 1998, në ditën e tretë të luftimeve, rezistenca u shua në mënyrë tragjike. Në atë sulm u vranë 58 anëtarë të familjes Jashari, përfshirë edhe Adem Jasharin, vëllain e tij Hamzën dhe shumë gra e fëmijë të familjes. Ishte një nga masakrat më të rënda të luftës në Kosovë dhe një moment që mobilizoi mijëra shqiptarë për t’iu bashkuar luftës çlirimtare.
Mes tyre ra edhe Besimi i ri. Edhe pse në moshë të vogël, ai zgjodhi të qëndronte pranë babait dhe familjes së tij deri në fund. Për këtë arsye emri i tij përmendet shpesh si simbol i sakrificës së brezit më të ri në atë betejë.
Sot, emri i Besimit nuk është vetëm një kujtim familjar. Ai është pjesë e historisë së rezistencës së Kosovës dhe një dëshmi se liria e këtij vendi nuk erdhi rastësisht — ajo u pagua me jetën e një familjeje të tërë që zgjodhi të mos dorëzohej.(INA)
