Australia ka njoftuar këtë të dielë se do të shpenzojë 3.9 miliardë dollarë australianë (2.76 miliardë dollarë amerikanë) për të përparuar ndërtimin e një kantieri detar që do të ndihmojë në dorëzimin e nëndetëseve me energji bërthamore, në kuadër të paktit të mbrojtjes trepalëshe AUKUS me SHBA-të dhe Britaninë.
Njoftuar në vitin 2021, AUKUS është investimi më i madh ndonjëherë i Australisë në mbrojtje. Ai parashikon vendosjen e nëndetëseve amerikane të klasit Virginia në Australi nga viti 2027, shitjen e disa nëndetëseve Virginia te Australia rreth vitit 2030, dhe ndërtimin nga Britania dhe Australia të një klase të re nëndetësesh bërthamore nën AUKUS.
Kryeministri australian Anthony Albanese e përshkroi shumën prej 3.9 miliardë dollarësh australianë si një parapagim për ndërtimin e kantierit të ri në Osborne, një periferi e Adelaide në shtetin e Australisë Jugore.
“Investimi në kantierin e ndërtimit të nëndetëseve në Osborne është kritik për dorëzimin e nëndetëseve tona bërthamore, të armatosura konvencionalisht,” tha Albanese në një deklaratë, sipas Reuters.
Projeksionet zyrtare e vendosin koston totale të ndërtimit në 30 miliardë dollarë australianë “gjatë dekadave të ardhshme,” shtoi ai.
Osborne është vendi ku ASC e Australisë dhe BAE Systems e Britanisë do të ndërtojnë së bashku flotën e nëndetëseve bërthamore të Australisë, komponenti kryesor i paktit AUKUS. Derisa kjo punë të nisë më vonë këtë dekadë, kantieri është vendi ku kryhet pjesa më e madhe e mirëmbajtjes së flotës ekzistuese të nëndetëseve të klasit Collins.
Kryeministri i Australisë Jugore, Peter Malinauskas, tha se parapagimi do të përdoret për ndërtimin e infrastrukturës mbështetëse për kantierin. “Ky është vetëm fillimi,” tha Malinauskas.
