Si zakonisht, në prag të Krishtlindjeve, presidenti amerikan i drejtohet kombit. Në fjalimin e tij – pas pothuajse një viti në detyrë – Trump kryesisht lëvdon veten. Dhe kritikon Bidenin.
Ai qëndronte midis dy pemëve të Krishtlindjeve në Shtëpinë e Bardhë dhe tha se do të shpërndajë para për “luftëtarët”, siç i ka quajtur së fundmi ushtarët amerikanë. Presidenti i SHBA-së Donald Trumpmbajti një fjalim drejtuar kombit, në të cilin mbrojti politikën e tij ekonomike, e cila është pritur me shumë kritika.
Pak gjëra të reja
Presidenti i drejtohet kombit kur dëshiron të bëjë njoftime të rëndësishme ose kur ndodh një moment i rëndësishëm për amerikanët. Për shembull, paraardhësi i Trumpit, Joe Biden, shpjegoi më hollësisht tërheqjen e tij nga gara zgjedhore presidenciale në një fjalim të tillë.
Trump e përdori këtë skenë tani për t’i dhënë vetes një vlerësim shumë të mirë, pas pothuajse një viti në pushtet. Ai theksoi vazhdimisht se ekonomia është në një trajektore në rritje dhe se amerikanët së shpejti do ta ndiejnë atë në portofolet e tyre.
Trump theksoi përsëri se një vit më parë vendi ishte “i vdekur”, dhe se tani është “më i dëshirueshmi” në të gjithë botën. Në fjalimin e tij, i cili zgjati rreth 18 minuta, republikani pikturoi një të kaluar të zymtë me miliona të huaj kriminelë në vend, një shoqëri “të zgjuar” dhe një inflacion të pakontrolluar.
Sipas tij, administrata e mëparshme e demokratit Biden është fajtore për gjithçka. E ardhmja, premtoi Trump, duket shumë më mirë.
Trump i solli një dhuratë një grupi që është veçanërisht e rëndësishme për të: ushtarët ose “luftëtarët” do të marrin një pagesë të të ashtuquajturit “dividend lufte”. Trump premtoi se pothuajse 1.5 milion anëtarë ushtarakë do të marrin një çek në shumën prej 1,776 dollarësh. Kjo shumë i referohet vitit kur Shtetet e Bashkuara shpallën pavarësinë – 1776! Administrata Trump kohët e fundit e riemëroi Pentagonin në Departamentin e Luftës.
Çfarë nuk tha Trump
Presidenti i SHBA-së nuk e përmendi agresionin e Rusisë kundër Ukrainës – në një javë në të cilën një seri takimesh të politikanëve të lartë po zhvillohen në Evropë. As Venezuelën nuk e përmendi. Vetëm një ditë më parë, i njëjti Trump rriti ndjeshëm presionin mbi Presidentin autoritar Nicolas Maduro dhe urdhëroi bllokimin e cisternave të naftës të sanksionuara në brigjet e Venezuelës.
Megjithatë, ai e anashkaloi këtë temë – ai përmendi vetëm kalimthi luftën kundër kontrabandës së drogës në det, e cila, siç tha ai, po shkon mirë.
Trump nën presion
Trump është nën presion të madh në frontin politik të brendshëm. Çështja e kostos së jetesës po rëndon veçanërisht mbi të, sepse shumë amerikanë ankohen për çmimet e larta në supermarkete. Ai akuzon demokratët se e shtyjnë qëllimisht këtë çështje në plan të parë.
Në fjalimin e tij, pavarësisht kritikave për çmimet e larta, Trumptha: “Pagat po rriten shumë më shpejt sesa inflacioni. A nuk është kjo shumë mirë?”
Kjo çështje mund të jetë vendimtare për zgjedhjet e mesit të mandatit për Kongresin e SHBA-së, të cilat mbahen në pak më pak se një vit. Republikanët aktualisht kanë një shumicë të ngushtë si në Senat ashtu edhe në Dhomën e Përfaqësuesve.
Edhe pse Trumpit, si ish-biznesmen, iu vlerësua kompetencë e veçantë në fushën e ekonomisë para mandatit të tij të dytë, sondazhet e fundit të opinionit publik tregojnë se mbështetja e tij në këtë fushë po dobësohet. Gjatë fjalimit të tij në televizion, u shfaqën disa grafika me të cilat ai prezantoi tema të tilla si trendet e çmimeve të benzinës, akullores ose salçiçeve.
Dosjet Epstein – koha po mbaron
Megjithatë, Trump është i shqetësuar edhe për disa shkaqe të tjera. Midis tyre është skandali rreth abuzuesit seksual Jeffrey Epstein, i cili vdiq në vitin 2019. Të dy e njihnin njëri-tjetrin, siç konfirmohet nga fotografitë në të cilat shfaqen së bashku. Megjithatë, nuk ka prova që do të tregonin përfshirjen e Trumpit në këtë skandal. Vetëm pas presionit të fortë nga Kongresi Amerikan, Trump nënshkroi një ligj që urdhëron publikimin e dokumenteve hetimore në rastin e një zinxhiri të dyshuar abuzimesh, viktimat e të cilit, siç dyshohet, ishin shumë persona të mitur. Dokumentet duhet të publikohen deri më 19 dhjetor.
Edhe pse Trumpi kishte kërkuar publikimin e dosjeve gjatë fushatës së tij presidenciale, ai që atëherë ka rezistuar ta bëjë këtë. Rasti është veçanërisht i rrezikshëm për Trumpin sepse tregon se mbështetja brenda Partisë Republikane – madje edhe brenda lëvizjes së tij MAGA- mund të ketë filluar të dobësohet. /DW
