Kryetari i BDI-së, Ali Ahmeti, ka shprehur mbështetje të fuqishme për aksionin e Shteteve të Bashkuara të Amerikës në Venezuelë, duke ritheksuar partneritetin strategjik dhe historik me SHBA-të.
Përmes një statusi të publikuar në rrjetet sociale, Ahmeti ka theksuar se mbështetja ndaj SHBA-së ka qenë dhe mbetet një zgjedhje e qartë dhe e drejtë, duke vlerësuar lidershipin e Presidentit Donald Trump dhe angazhimin amerikan kundër regjimeve autoritare dhe strukturave kriminale që kërcënojnë demokracinë dhe sigurinë globale.
Ai nënvizoi se qëndrimi i fortë ndaj narkoliderëve dhe krimit të organizuar është në shërbim jo vetëm të Amerikës, por edhe të paqes dhe stabilitetit ndërkombëtar, duke shtuar se popujt meritojnë të jetojnë të lirë, me institucione demokratike dhe sundim të ligjit.
“Shtetet që kanë kaluar rrugë të vështira drejt lirisë e kuptojnë më së miri peshën e vendimeve të guximshme amerikane. Historia jonë është dëshmi e drejtpërdrejtë e kësaj mbështetjeje”, ka theksuar Ahmeti.
Në fund, ai ka ritheksuar se partneriteti transatlantik është më i fortë kur mbështetet në vlera të përbashkëta dhe qëndrim të bashkuar përballë tiranisë, duke përmbyllur mesazhin me thirrjen: “Kur Amerika qëndron e fortë, qëndrojmë të fortë së bashku.”
Ali Ahmeti: Mbështetje e palëkundur për SHBA-të dhe Presidentin Trump në përballjen me regjimet autoritare
