Më 7 nëntor 1867, në Varshavë të Polonisë, lindi Marie Curie, një nga shkencëtaret më të njohura në historinë e shkencës, e cila u shqua për kontributin e saj në fizikë dhe kimi, veçanërisht në studimin e radioaktivitetit.
E lindur me emrin Maria Skłodowska, ajo u shpërngul në Paris në vitin 1891, ku vazhdoi studimet në Universitetin e Sorbonës. Atje u njoh me shkencëtarin Pierre Curie, me të cilin u martua dhe bashkëpunoi në kërkimet shkencore.
Së bashku, ata zbuluan dy elemente kimike, poloniumin dhe radiumin, duke dhënë një kontribut të rëndësishëm në zhvillimin e shkencës. Për punën e tyre mbi radioaktivitetin, Marie dhe Pierre Curie, së bashku me Henri Becquerel, u nderuan me Çmimin Nobel në Fizikë në vitin 1903.
Në vitin 1911, Marie Curie fitoi edhe Çmimin Nobel në Kimi, duke u bërë personi i parë që fitoi çmime Nobel në dy fusha të ndryshme shkencore. Ajo ndërroi jetë më 4 korrik 1934, në Francë, por puna dhe zbulimet e saj mbeten ndër kontributet më të rëndësishme në historinë e shkencës./KultPlus.com
