Ministrat e Jashtëm të tetë vendeve evropiane dhe të Lindjes së Mesme u takuan në Stamboll, ku diskutuan rihapjen e Ngushticës së Hormuzit dhe krizat në Lindjen e Mesme. Në takim morën pjesë përfaqësues nga Britania e Madhe, Franca, Gjermania, Italia, Arabia Saudite, Egjipti, Pakistani dhe Turqia.
Bisedimet u përqendruan te konflikti izraelito-palestinez, situata në Jemen, siguria e lundrimit në Ngushticën e Hormuzit dhe mundësitë për t’i dhënë fund luftës mes Rusisë dhe Ukrainës, njoftoi Ministria e Jashtme e Gjermanisë.
Ministri i Jashtëm gjerman, Johann Wadephul, deklaroi se tetë vendet po dërgojnë një mesazh të përbashkët se nuk do të lejojnë që Irani dhe rebelët Huthi të kërcënojnë tregtinë botërore dhe të pengojnë furnizimin global me energji dhe plehra kimike.
Ai bëri thirrje për ndalimin e sulmeve ndaj lirisë së lundrimit dhe vendeve fqinje, duke theksuar se Gjermania mbështet sigurinë detare dhe merr pjesë në operacionin e Bashkimit Evropian „ASPIDES“, i cili mbron anijet tregtare në Detin e Kuq dhe në Gjirin e Adenit.
