Deri në 500 shkolla të mesme në Francë pritet të qëndrojnë pjesërisht ose plotësisht të mbyllura të hënën, në një kohë kur protestat e nxënësve për kushtet në institucionet arsimore janë përshkallëzuar në disa pjesë të vendit.
Ministri francez i Arsimit, Edouard Geffray, deklaroi se mësimi do të jetë “plotësisht ose pjesërisht i pezulluar” në qindra shkolla për shkak të situatës së krijuar nga protestat.
Sipas ministrit, që nga fillimi i lëvizjes, 24 shkolla janë “djegur ose plaçkitur”. Protestat, të nisura fillimisht në rajonin e Parisit, janë zgjeruar në zona të tjera të vendit.
Nxënësit kanë organizuar protesta dhe bllokime pranë shkollave, duke kundërshtuar mbipopullimin në klasa, mungesën e mësuesve dhe gjendjen e amortizuar të disa ndërtesave shkollore.
Në disa raste, protestat kanë marrë përmasa të dhunshme. Demonstruesit janë shfaqur me maska, ndërsa janë raportuar zjarre në rrugë dhe përplasje mes protestuesve dhe policisë. Pamje të publikuara nga protestat tregojnë gjithashtu përplasje fizike mes forcave të rendit dhe nxënësve.
Të paktën 5 mijë persona, kryesisht adoleshentë, janë arrestuar gjatë trazirave, ndërsa dhjetëra persona, përfshirë nxënës dhe mësues, janë plagosur.
Ndërkohë, sindikatat kanë bërë thirrje për grevë të mësuesve, ndërsa protesta të tjera janë planifikuar për ditët në vijim.
Shefi i policisë së Parisit, Patrice Faure, u ka bërë thirrje nxënësve të heqin dorë nga bllokadat e shkollave dhe t’u rikthehen formave paqësore të protestës.
Ai ka paralajmëruar gjithashtu prindërit për mundësinë e përfshirjes së personave të tjerë në trazira, duke iu referuar “protestuesve profesionistë”.
Autoritetet franceze kanë paralajmëruar se situata mund të përshkallëzohet më tej, ndërsa institucionet e sigurisë po përgatiten për protestat e reja të paralajmëruara për këtë javë.
