Ministri i Bujqësisë, Pylltarisë dhe Ekonomisë së Ujërave, Borçe Serafimovski, ka prezantuar Projektligjin e ri për rregullimin e tregjeve me produkte bujqësore, duke theksuar se synimi është krijimi i një sistemi më transparent dhe më të sigurt për prodhuesit.
Gjatë debatit publik për projektligjin, Serafimovski tha se përgjegjësia do të përcaktohet më qartë mes prodhuesve, blerësve dhe përpunuesve, ndërsa bujqit do të kenë më shumë siguri në plasmanin e produkteve.
Sipas tij, kontratat me shkrim do të lidhen para dorëzimit të produkteve dhe do të përcaktojnë sasinë, cilësinë, çmimin ose mënyrën e llogaritjes së tij, afatin e pagesës dhe shpenzimet e lidhura. Ai theksoi se projektligji nuk parashikon përcaktim administrativ të çmimeve të blerjes.
Projektligji parashikon gjithashtu evidencë elektronike për blerësit e regjistruar dhe krijimin e një sistemi informativ të tregut bujqësor, i cili do të mbledhë të dhëna për prodhimin, ofertën, kërkesën, rezervat, çmimet, importin dhe eksportin.
Serafimovski tha se organizimi i prodhuesve në grupe dhe organizata do të synojë forcimin e pozitës së tyre negociuese dhe qasjen më të mirë te blerësit më të mëdhenj.
Në projektligj parashikohen edhe masa për ndërhyrje publike dhe mbështetje për magazinim privat në rast të çrregullimeve serioze në treg. Sipas ministrisë, zgjidhja e re synon gjithashtu harmonizimin me rregullat e Bashkimit Evropian për organizimin e tregjeve bujqësore.
