Kryetari i LSDM-së, Venko Filipçe, deklaroi sot se Shtetet e Bashkuara të Amerikës, si partner strategjik i Maqedonisë së Veriut, janë të informuara, sipas tij, për financimet që kanë hyrë në vend gjatë dy viteve të fundit.
Filipçe përmendi huanë prej një miliard eurosh të marrë nga Hungaria, si dhe projektet e paralajmëruara në komuna nga ministri i Vetëqeverisjes Lokale, Ivan Stoilkovikj.
Sipas Filipçes, një pjesë e këtyre financimeve lidhet me mjete nga Kina. Ai tha se për këtë çështje janë të informuar edhe partnerët strategjikë të vendit.
“Huaja që tani është objekt hetimi, huaja për shkak të së cilës është ngritur vëmendja lidhur me qeverinë e udhëhequr nga Hristijan Mickoski. Tani, kur edhe partnerët tanë strategjikë, SHBA-ja, e dinë qartë se në vend po hyjnë dhe kanë hyrë para kineze gjatë dy viteve të fundit. Fillimisht përmes huasë që erdhi nga Hungaria, e tani përmes paralajmërimeve të ministrit për projekte në komuna”, deklaroi Filipçe.
Ai foli edhe për borxhin publik, duke e lidhur rritjen e tij me huanë e marrë nga Hungaria.
“Qytetarët e dinë më së miri, çdo ditë nën qeverisjen e Hristijan Mickoskit jetojnë gjithnjë e më keq. Sa i dëshpëruar duhet të jetë dikush për të thënë se kanë trashëguar borxh 61,4% të BPV-së në vitin 2024, kur e vërteta është se borxhi u rrit në 61,4% të BPV-së pas huasë nga Hungaria prej 1 miliard euro”, tha Filipçe.
Deklaratat e Filipçes paraqesin qëndrimin e tij lidhur me financimet, huanë hungareze dhe politikat ekonomike të qeverisë.
