Zëvendëskryeministri dhe ministri i Transportit, Aleksandar Nikoloski, zhvilloi sot një takim pune me drejtorin e përgjithshëm të EUROCONTROL-it, Raul Medina, ku në fokus ishte bashkëpunimi për avancimin e sigurisë, efikasitetit dhe cilësisë së trafikut ajror në Maqedoninë e Veriut.
Në takim morën pjesë edhe drejtori i Agjencisë së Aviacionit Civil, Dragi Stojanoski, si dhe drejtori i M-NAV, Vladimir Risteski.
Gjatë takimit u diskutua bashkëpunimi i deritanishëm me EUROCONTROL-in dhe mundësitë për forcimin e mëtejshëm të kapaciteteve të autoriteteve të aviacionit në vend.
Nikoloski theksoi se institucionet po punojnë në mënyrë të vazhdueshme për zhvillimin e kapaciteteve teknike dhe operative të Agjencisë së Aviacionit Civil dhe M-NAV, ndërsa është duke u përgatitur edhe një plan për përmirësimin dhe forcimin e burimeve njerëzore.
Sipas tij, masat e ndërmarra nga Qeveria synojnë rritjen e kapaciteteve operative të autoriteteve të aviacionit dhe krijimin e kushteve për zhvillim të qëndrueshëm të transportit ajror.
Në takim u theksua gjithashtu rritja e ndjeshme e trafikut ajror në Maqedoninë e Veriut, si në numrin e operacioneve ashtu edhe në numrin e udhëtarëve. Ky trend, sipas autoriteteve, kontribuon në lidhjen më të mirë të vendit me destinacionet ndërkombëtare, tërheqjen e kompanive të reja ajrore dhe krijimin e mundësive të reja për qytetarët dhe ekonominë.
Nikoloski bëri të ditur se sistemi i ri radarik tashmë është instaluar dhe pritet të forcojë më tej kapacitetet teknike për menaxhimin e trafikut ajror.
Në takim u konfirmua rëndësia e vazhdimit të bashkëpunimit me EUROCONTROL-in, përmes Programit për Mbështetjen e Shteteve, me fokus në prioritetet kombëtare dhe në përmirësimin e sigurisë, efikasitetit dhe cilësisë së trafikut ajror.
Vizita e drejtorit të EUROCONTROL-it në Maqedoninë e Veriut zhvillohet në kuadër të takimit të autoriteteve të aviacionit të vendeve të rajonit, të organizuar nga Agjencia e Aviacionit Civil.
