LSDM ka reaguar lidhur me rastin e fundit të zbuluar në Ministrinë e Punëve të Brendshme, ku dyshohet për lëshimin e lejeve të falsifikuara të vozitjes për drejtimin e kamionëve dhe autobusëve.
Sipas LSDM-së, për rreth 1.400 euro ryshfet, personave që nuk kishin ndjekur trajnimin përkatës dhe nuk kishin dhënë provim dyshohet se u janë shtuar në sistem kategoritë “C” dhe “D”.
Partia opozitare vlerëson se rasti ngre shqetësime serioze për sigurinë në komunikacion dhe kërkon hetim të plotë për mënyrën se si është realizuar skema.
Sipas pretendimeve të LSDM-së, në këtë mënyrë janë lëshuar më shumë se 300 leje të parregullta, të cilat, sipas tyre, duhet të identifikohen dhe anulohen nga institucionet kompetente.
LSDM kërkon që ministri i Punëve të Brendshme, Pançe Toshkovski, të japë përgjigje se kush është përfshirë në rast, si ka qenë e mundur që një numër i madh dokumentesh të falsifikohen brenda sistemit dhe ku kanë përfunduar paratë e dyshuara si ryshfet.
Partia kërkon nga Prokuroria Publike një hetim të pavarur dhe të plotë, ndërsa institucionet përgjegjëse të ndërmarrin masa për verifikimin e lejeve të dyshuara.
LSDM kërkon gjithashtu përgjegjësi politike dhe objektive për rastin, duke vlerësuar se ministri duhet të japë llogari për funksionimin e sistemit në kuadër të Ministrisë së Punëve të Brendshme.
