Ish-kryeministri dhe deputeti i LSDM-së, Dimitar Kovaçevski, ka reaguar ndaj vendimit të Këshillit të Komunës së Pehçevës për të mos e mbështetur iniciativën për ndërtimin e një qendre të të dhënave.
Në një postim në rrjetet sociale, Kovaçevski e komentoi me ironi vendimin, duke shkruar: “Ka pasur fat Amerika që Pehçeva nuk është në Silicon Valley, e edhe Kina që Pehçeva nuk është në Shangai… çfarë do të bënin sot me tepricën e ujit”.
Vendimi për refuzimin e iniciativës u mor me votat e të gjithë nëntë këshilltarëve të pranishëm. Bëhej fjalë për një iniciativë të një investitori privat për përgatitjen e dokumentacionit urbanistik për projektin.
Reagimi i Kovaçevskit vjen pas qëndrimit të liderit të LSDM-së, Venko Filipçe, i cili një ditë më parë kishte shprehur shqetësime lidhur me ndikimin e mundshëm të data qendrave në burimet e ujit dhe energjisë elektrike.
Filipçe kishte bërë thirrje për vlerësim të detajuar të projekteve të tilla dhe për mbrojtjen e burimeve natyrore.
Në Këshillin e Komunës së Pehçevës, kundër iniciativës votuan pesë këshilltarë të VMRO-DPMNE-së dhe koalicionit, tre të LSDM-së dhe një këshilltar i ZNAM-it.
Si arsye për vendimin u përmendën, ndër të tjera, mungesa e informacionit të mjaftueshëm për investitorin, konsumi i mundshëm i ujit dhe energjisë, si dhe ndikimi në mjedis.
Kryetari i Komunës së Pehçevës, Aleksandar Kitanski, deklaroi se për momentin mungon një studim profesional që do të përcaktonte ndikimin e saktë të projektit.
Qëndrimet e ndryshme të Kovaçevskit dhe Filipçes kanë nxitur debat për mënyrën se si duhet të trajtohen projektet e data qendrave, veçanërisht sa i përket përdorimit të ujit dhe energjisë, infrastrukturës dhe mbrojtjes së mjedisit.
