Rikonstruktimi i Qeverisë nuk nënkuptoi edhe largimin e Shaban Saliut nga pushteti ekzekutiv. Pas shkarkimit nga posti i ministrit pa resor, të ngarkuar për integrimin dhe zbatimin e Strategjisë për Përfshirjen e Romëve, Saliu është emëruar koordinator kombëtar për monitorimin e Strategjisë për Përfshirjen e Romëve 2022–2030.
Vendimi është marrë në seancën e Qeverisë më 21 korrik, në periudhën kur Saliu përfundoi mandatin si anëtar i Qeverisë dhe në postin ministror u emërua Erxhan Demiri.
Me funksionin e ri, Saliu do të vazhdojë të koordinojë Trupin Koordinues Kombëtar për monitorimin e zbatimit të Strategjisë për Përfshirjen e Romëve.
Saliu kishte njoftuar më herët se do të vazhdonte angazhimin në këtë fushë dhe kishte falënderuar Qeverinë për besimin e dhënë.
Pozita e koordinatorit kombëtar është funksion i paguar nga buxheti i shtetit. Sipas të dhënave të publikuara për këto pozita, pagat mujore të koordinatorëve variojnë nga rreth 100 mijë deri në 125 mijë denarë, në varësi të koeficientit dhe përvojës së punës.
Kështu, pas përfundimit të mandatit ministror, Saliu ka vazhduar angazhimin në kuadër të pushtetit ekzekutiv, tashmë në një funksion tjetër qeveritar.
