Ministri i Punëve të Brendshme, Pançe Toshkovski, mori pjesë sot në Ohër në ceremoninë qendrore me rastin e 18 Gushtit – Ditës së Ushtrisë dhe 34-vjetorit të formimit të Ushtrisë moderne maqedonase.
Me këtë rast, Toshkovski uroi të gjithë pjesëtarët e Ushtrisë, duke vlerësuar kontributin e tyre në mbrojtjen e shtetit dhe sigurinë e qytetarëve. Ai theksoi se Ushtria përfaqëson një nga shtyllat më të rëndësishme të sistemit të sigurisë dhe është faktor kyç në ruajtjen e stabilitetit të vendit.
Sipas tij, nga periudha e luftës për liri dhe shtetformimit e deri te Ushtria moderne e sotme, ka mbetur e pandryshuar përgjegjësia për mbrojtjen e atdheut, lirisë dhe sigurisë së qytetarëve. Toshkovski nënvizoi se Ushtria e Maqedonisë së Veriut është profesionale, e respektuar dhe kontribuon në sigurinë kolektive si pjesë e NATO-s.
Ai veçoi edhe bashkëpunimin ndërmjet Ministrisë së Punëve të Brendshme dhe Ushtrisë, duke theksuar se institucionet e sigurisë kanë një mision të përbashkët në mbrojtjen e qytetarëve dhe interesave shtetërore.
Në kuadër të aktiviteteve për shënimin e Ditës së Ushtrisë, Toshkovski vendosi lule pranë monumentit të luftëtarëve të LNÇ-së në Aleanë e të Mëdhenjve, si dhe te varret e ish-presidentëve Boris Trajkovski dhe Kiro Gligorov, si dhe të gjeneralit Mihailo Apostolski, duke nderuar figurat që kanë lënë gjurmë në historinë e shtetit.
Në fund, ministri shprehu mirënjohje për të gjithë pjesëtarët e Ushtrisë për përkushtimin dhe shërbimin e tyre, duke ua uruar Ditën e Ushtrisë dhe 34-vjetorin e formimit të saj.
