Qeveria e Bullgarisë, e drejtuar nga kryeministri Rumen Radev, ka publikuar Programin për qeverisjen e vendit deri në vitin 2030, ku një pjesë e rëndësishme i kushtohet politikës së jashtme dhe marrëdhënieve me vendet fqinje.
Në pjesën për diplomacinë, Sofja thekson rëndësinë e marrëdhënieve të mira fqinjësore, duke nënvizuar se ato duhet të bazohen në respektimin e marrëveshjeve dhe detyrimeve të ndërmarra nga palët.
Në raport me Maqedoninë e Veriut, dokumenti veçon mbrojtjen e të drejtave të qytetarëve me vetëdije bullgare si një nga prioritetet e politikës së saj. Sipas programit, zhvillimi i marrëdhënieve mes dy vendeve lidhet me zbatimin e marrëveshjeve të arritura dhe respektimin e standardeve evropiane për të drejtat e njeriut dhe pakicave.
Bullgaria në dokument rikonfirmon edhe mbështetjen për zgjerimin e Bashkimit Evropian, duke e cilësuar atë si të rëndësishëm për stabilitetin, sigurinë dhe zhvillimin ekonomik të rajonit.
Megjithatë, Sofja thekson se përparimi i vendeve kandidate drejt BE-së duhet të shoqërohet me përmbushjen e kritereve dhe detyrimeve të përcaktuara në procesin e integrimit.
Programi vjen në një kohë kur vazhdojnë përpjekjet diplomatike për tejkalimin e pengesave në rrugën evropiane të Maqedonisë së Veriut.
Dokumenti deri në vitin 2030 tregon se Bullgaria synon të vazhdojë qasjen e saj aktuale ndaj Shkupit, duke kombinuar mbështetjen për integrimin evropian me kërkesat për zbatimin e marrëveshjeve dypalëshe dhe garantimin e të drejtave të bullgarëve në Maqedoninë e Veriut.
