Shkup, 13 korrik – Në seancën e sotme të Kuvendit foli deputeti dhe koordinatori i grupit parlamentar të VMRO‑DPMNE‑së, Nikola Micevski, i cili theksoi se stabiliteti ekonomik dhe zbatimi i masave konkrete janë kyçe për arritjen e rezultateve afatgjata, duke nënvizuar se politikat aktuale po japin efekte pozitive mbi gjendjen në vend.
“Maqedonisë i duhen njerëz që sjellin rezultate të qëndrueshme dhe afatgjata. Ndërsa ne ofrojmë zgjidhje, vizion dhe reforma, nga ana tjetër shohim vetëm mungesë idesh dhe frikë. Ndërsa qeveritë e kaluara na bindnin se inflacioni është i importuar dhe se nuk mund të bëhet asgjë, kjo Qeveri me hapa dhe masa të mençura ekonomike e stabilizoi situatën. Inflacioni vjetor për muajin qershor në Maqedoni është 3,4%, por ajo që është sukses i veçantë dhe thelbësor i ekonomisë dhe politikave ekonomike është fakti se inflacioni te ushqimet dhe pijet joalkoolike është ulur në 2,5%, ndërsa te veshjet dhe këpucët në 2,1%. Përqindja e përgjithshme e inflacionit vjetor në qershor është artificialisht e rritur nga çmimet e pijeve alkoolike dhe duhanit, që shënojnë rritje prej 9,3%, si dhe transporti me 6,2%”, tha Micevski dhe shtoi:
“Për të parë se ku ndodhet Maqedonia sot me 3,4%, mjafton të shohim rajonin dhe vendet fqinje. Në qershor, Greqia ka inflacion 3,9%, Sllovenia 3,6%, Kroacia 4,5%, Bullgaria 5,6%, Turqia përballet me 32,11%. Kjo është dëshmi se Maqedonia sot menaxhon me sukses valët ekonomike.”
Micevski theksoi se rezultatet ekonomike janë tregues i drejtpërdrejtë i mënyrës së udhëheqjes së politikave shtetërore dhe përballimit të sfidave, duke nënvizuar se Qeveria aktuale, me qasje të përgjegjshme dhe masa konkrete, po arrin të përgjigjet ndaj kushteve të ndërlikuara ekonomike, në krahasim me qeverinë e mëparshme.
“Ne vazhdojmë të punojmë me përkushtim për qytetarët, por krahasimi më i dukshëm që tregon dallimin në qeverisje dhe përgjegjësi mes qeverisë së mëparshme dhe kësaj Qeverie është qershori 2026 me qershorin 2022. Në qershor 2022, kur qeveria e atëhershme e paaftë e udhëhequr nga BDI dhe SDSM lejoi inflacionin të shpërthente në 14,5%, sot, në krizën e dytë të madhe, kjo Qeveri arriti ta mbajë inflacionin vetëm në 3,4%. Këto janë numrat, faktet dhe të dhënat që, për fat të keq, opozita në Maqedoni bën sikur nuk i sheh dhe i lexon ndryshe nga të gjithë”, përfundoi Micevski. përcjell Zhurnal.mk .
